ডাচ ট্ৰিট

ডাচ ট্ৰিট (ইংৰাজী ভাষা: Dutch Treat) হ’ল ১৯৮৭ চনৰ এখন একচন কমেডী চলচ্চিত্ৰ। ইয়াৰ কাহিনী ৰচনা কৰাৰ লগতে মুখ্য চৰিত্ৰত অভিনয় কৰিছে ডেভিদ লেণ্ডচবাৰ্গ আৰু লৰিন ড্ৰাইফুচে। ছবিখন দ্য কেনন গ্ৰুপৰ বেনাৰত নিৰ্মাণ কৰা হৈছে।

চলচ্চিত্ৰখন দুজন আমেৰিকান কটাৰী নিক্ষেপকাৰী (knife throwers)ৰ ওপৰত কেন্দ্ৰিত। এমষ্টাৰডামত তেওঁলোকে এটা প্ৰতিভাৱান মহিলা বেণ্ডক লগ পায় আৰু বেণ্ডটোৰ সদস্যসকলক পতিয়ন নিয়ায় যে তেওঁলোকে এটা ৰেকৰ্ড কোম্পানীত কাম কৰে। আমেৰিকান দুজন লছ এঞ্জেলছলৈ ঘূৰি আহে আৰু তাত বেণ্ডটোৱে তেওঁলোকক সাক্ষাৎ কৰে। এই যুটিটোৱে বেণ্ডটোক ৰেকৰ্ড কোম্পানীটোৰ সৈতে এটা প্ৰকৃত চুক্তি কৰাত সহায় কৰিবলৈ চেষ্টা কৰে।

কাহিনী

জেৰী মৰ্গান আদালতত হাজিৰ হয়। তেওঁ ২৫০তকৈও অধিক পাৰ্কিং উলংঘনৰ উত্তৰ দিব লগা হয়, যিবোৰ আচলতে তেওঁৰ বন্ধু নৰ্মে জেৰীৰ গাড়ীখন ব্যৱহাৰ কৰি কৰিছিল। নৰ্মৰ পৰামৰ্শমতে জেৰীয়ে কম শাস্তি পোৱাৰ আশাত দোষ স্বীকাৰ কৰে, কিন্তু এতিয়া তেওঁ কেইবাসপ্তাহৰ বাবে কাৰাগাৰলৈ যাব লগা হয়। মুক্তি পোৱাৰ কিছু সময়ৰ পিছতে জেৰীয়ে গম পায় যে এইখিনি সময়ৰ ভিতৰত নৰ্মে তেওঁৰ ফ্লেটটো আনক ভাড়াত দিছে আৰু তেওঁৰ প্ৰেমিকায়েও তেওঁক এৰি থৈ গৈছে।

যিহেতু দুয়োৰে হাতত ধনৰ অভাৱ আছিল, নৰ্মে হলেণ্ডৰ এখন জাহাজত কাম কৰাৰ আৰু কটাৰী নিক্ষেপকাৰী হিচাপে প্ৰদৰ্শন কৰাৰ এটা ধাৰণা পালে। কিন্তু সকলো ওলোটা হৈ পৰে আৰু তেওঁলোকে জাহাজখনৰ দুজন কৰ্মচাৰীক হত্যা কৰে। সেয়েহে এমষ্টাৰডামত উপস্থিত হোৱাৰ লগে লগে তেওঁলোকক আৰক্ষীৰ জিম্মাত লোৱা হয় আৰু তিনিদিন পিছত এখন মালবাহী জাহাজত আমেৰিকালৈ ঘূৰি যাবলৈ নিৰ্দেশ দিয়া হয়। তেওঁলোকৰ হাতত চহৰখন ভ্ৰমণ কৰিবলৈ কিছু সময় আছিল, য’ত তেওঁলোকে এটা প্ৰতিভাৱান মহিলা বেণ্ড 'ডলী ডটছ'ক লগ পায়। নৰ্মে জেৰীৰ এজন কৰ্মচাৰী হিচাপে পৰিচয় দিয়ে আৰু জেৰীক কেপিটেল ৰেকৰ্ডছৰ মুৰব্বী লু উইণ্টাৰ্ছ বুলি চিনাকি কৰায়। তেওঁলোকে মহিলাসকলক প্ৰস্তাৱ দিয়ে যে যদি তেওঁলোকে কেতিয়াবা লছ এঞ্জেলছ ভ্ৰমণ কৰে, তেন্তে তেওঁলোকক সদায় আদৰণি জনোৱা হ’ব। সন্ধিয়া তেওঁলোকে বেণ্ডটোৰ আন এটা অনুষ্ঠানত অংশগ্ৰহণ কৰে, যাৰ ফলত এটা বিবাদৰ সৃষ্টি হয় আৰু সকলোৱে আৰক্ষীৰ জিম্মাত সোমাব লগা হয়। দায়িত্বত থকা আমেৰিকান বিষয়াগৰাকীয়ে লগে লগে আমেৰিকান দুজনক বিদায় দিব বিচাৰে। তেওঁ নিজেই তেওঁলোকক এটা সৰু বিমানবন্দৰলৈ লৈ যায় আৰু এখন লৰচৰ কৰি থকা বিমানত তুলি দিয়ে। এগৰাকী মদ্যপান কৰা মহিলা পাইলট আৰু তাইৰ সহজ-সৰল সহ-পাইলটৰ সৈতে তেওঁলোকে আমেৰিকা যুক্তৰাষ্ট্ৰলৈ ৰাওনা হয়।

লছ এঞ্জেলছলৈ ঘূৰি আহি জেৰী আৰু নৰ্মে তেওঁলোকৰ সাধাৰণ, কম দৰমহাৰ কাম কৰি থাকে। জেৰীয়ে এখন হোটেলৰ পাকঘৰত কাম কৰে আৰু নৰ্মে চহৰখনত টেক্সী চলায়। ডলী ডটছ সঁচাকৈয়ে লু উইণ্টাৰ্ছৰ অধীনত পৰিচালিত হ’বলৈ লছ এঞ্জেলছলৈ আহে। তেওঁলোকে জেৰীয়ে কাম কৰা একেখন হোটেলতে থাকে, কাৰণ লু উইণ্টাৰ্ছো তাতে আছিল। জেৰী আৰু নৰ্মে বিভিন্ন কৌশলৰ জৰিয়তে বেণ্ডটোৰ সন্মুখত তেওঁলোকৰ ভুৱা চৰিত্ৰটো সফলভাৱে চলাই নিবলৈ সক্ষম হয়। তেওঁলোকে বেণ্ডটোৰ বাবে এটা সৰু অনুষ্ঠানৰ ব্যৱস্থা কৰে আৰু তেওঁলোকক লৈ এখন পাৰ্টিলৈ যায়।

অৱশ্যে, তেওঁলোকৰ এই নাটকখন ধৰা পৰে যেতিয়া 'ডেড মিট' নামৰ এটা বেণ্ডৰ মুখ্য গায়িকাৰ সৈতে আচল লু উইণ্টাৰ্ছৰ চিনাকি হয়। ডলী ডটছ এই দুজন প্ৰতাৰকৰ ওপৰত অতিশয় নিৰাশ হয় আৰু তেওঁলোকে লছ এঞ্জেলছ এৰি পুনৰ হলেণ্ডলৈ যাব বিচাৰে। তথাপিও জেৰী আৰু নৰ্মে এক চূড়ান্ত পৰিকল্পনা কৰে, তেওঁলোকে নিশ্চিত কৰিব বিচাৰে যে বেণ্ডটোৱে এটা গুৰুত্বপূৰ্ণ অনুষ্ঠানত পৰিৱেশন কৰাৰ সুযোগ পায়। সন্ধিয়া বিভিন্ন সংগীত প্ৰযোজকৰ সন্মুখত ডেড মিটে পৰিৱেশন কৰাৰ কথা আছিল। জেৰী আৰু নৰ্মে শ্ৰমিকৰ ছদ্মবেশ লয় আৰু ডলী ডটছক ভিতৰলৈ লৈ যাবলৈ সক্ষম হয়। তেওঁলোকে মাইক্ৰ’ফোনলৈ যোৱা পাইপৰ মাজেৰে হিলিয়াম গেছ পঠিয়াই দিয়ে, যাৰ ফলত ডেড মিটৰ কণ্ঠস্বৰ সলনি হৈ পৰে। বেণ্ডটোৱে মঞ্চত অপমানিত হয় আৰু ইয়াৰ ফলত ডলী ডটছে মঞ্চত সোমাই গান গোৱাৰ সুযোগ পায়। লু উইণ্টাৰ্ছ সঁচাকৈয়ে সন্তুষ্ট হয় আৰু বেণ্ডটোৰ সৈতে চুক্তি কৰাৰ সিদ্ধান্ত লয়।

অভিনয় শিল্পী

• ডেভিদ লেণ্ডচবাৰ্গ: জেৰী মৰ্গানৰ চৰিত্ৰত
• লৰিন ড্ৰাইফুচ: নৰ্মৰ চৰিত্ৰত
• ৰিয়া ব্ৰিফীছ: ৰিয়াৰ চৰিত্ৰত
• এঞ্জেলা গ্ৰুথুইজেন: এঞ্জেলাৰ চৰিত্ৰত
• পেটি জোমাৰ: পেটিৰ চৰিত্ৰত
• এষ্টাৰ অষ্টাৰবেক: এষ্টাৰৰ চৰিত্ৰত
• এঞ্জেলা ক্ৰামাৰ্ছ: জীলৰ চৰিত্ৰত
• ৰনি চেল: লু উইণ্টাৰ্ছৰ চৰিত্ৰত
• কেৰল পটাৰ: বেটচি উইণ্টাৰ্ছৰ চৰিত্ৰত
• লী চেপাৰ্ড: ডিউক ক্লাৰ্কৰ চৰিত্ৰত
• হেংক গাৰেট: ভিটোৰ চৰিত্ৰত
• টেৰী কেমিলিৰি: মৰিচ ক্লাভাৰনানৰ চৰিত্ৰত

নিৰ্মাণ

'ডলী ডটছ' নামৰ বেণ্ডটো এটা প্ৰকৃত ডাচ বেণ্ড যি ১৯৭০ আৰু ১৯৮০ৰ দশকত নেদাৰলেণ্ডত অতি জনপ্ৰিয় আছিল। তেওঁলোকৰ ডাচ চাৰ্টত ১১টা গীত শীৰ্ষ দহটা স্থানত আছিল। তেওঁলোকৰ এলবাম 'ডাচ ট্ৰিট', যিটো চলচ্চিত্ৰখনৰ সৈতে একে নামৰ, ১৯৮৬ চনত মুক্তি পাইছিল।

আদৰণি

টিভি গাইডে ছবিখনক ৫ তৰাৰ ভিতৰত ২ তৰা প্ৰদান কৰিছে আৰু মন্তব্য কৰিছে— "ইয়াত বহুতো কৌতুক আছে, কিছুমান পুৰণি আৰু কিছুমান নতুন। ইয়াৰ গতি অতি খৰটকীয়া আৰু ছবিখন শেষ হোৱাৰ লগে লগে আপুনি ইয়াৰ কথা পাহৰি যাব। কিন্তু চাব ধৰিলে আপুনি অলপ হঁহাৰ সুযোগ পাব।"^১