জুংক' টাবেই

জুংক' টাবেই^১ এগৰাকী জাপানীজ পৰ্বতাৰোহী আছিল। তেওঁ পৃথিৱীৰ সৰ্বোচ্চ শৃংগ মাউণ্ট এভাৰেষ্ট আৰোহণ কৰা বিশ্বৰ প্ৰথম মহিলা। ইয়াৰ লগতে তেওঁ চেভেন চামিট অৰ্থাৎ বিশ্বৰ সপ্ত মহাদেশৰ প্ৰতিখনৰে সৰ্বোচ্চ স্থান আৰোহণ কৰা প্ৰথম গৰাকী মহিলা।^২৩৪

প্ৰাৰম্ভিক জীৱন

১৯৩৯ চনৰ ২২ ছেপ্টেম্বৰ তাৰিখে জাপানৰ মীহাৰু, ফুকুশ্বিমাত তেওঁৰ জন্ম হৈছিল।^৫৬ তেওঁ সৰুতে শাৰীৰিক ভাবে দুৰ্বল আছিল। ১০ বছৰ বয়সতে তেওঁ শ্ৰেণীৰ পৰ্বতাৰোহন ক্ষেত্ৰ অধ্যয়নত মাউন্ট নাছুলৈ যোৱাৰ সুযোগ লাভ কৰিছিল।^৫৭ তেতিয়াৰ পৰায়ে তেওঁ পৰ্বতাৰোহনৰ প্ৰতি আকৃষ্ট হৈছিল। কিন্তু সাত গৰাকী সন্তানৰ দুখীয়া পৰিয়ালত জন্মগ্ৰহণ কৰা জুংক'ৰ বাবে পৰ্বতাৰোহনৰ দৰে খৰচী বিষয় প্ৰায় অসম্ভৱ আছিল। তেতিয়াও তেওঁ হাইস্কুলত পঢ়ি থাকোঁতে কেইবাবাৰো পৰ্বতাৰোহন কৰিছিল।^৬

ব্যক্তিগত জীৱন

তেওঁ পৰ্বতাৰোহী মাছানবু টাবেই লগত বিবাহপাশত আবদ্ধ হৈছিল। তেওঁ ১৯৬৫ চনত মাছানবুক জাপানত পৰ্বতাৰোহনৰ সময়ত লগ পাইছিল। তেওঁলোকৰ দুগৰাকী সন্তান আছে।^৬

২০১২ চনত তেওঁৰ দেহত পেৰিটনিয়েল কৰ্কট ৰোগ ধৰা পৰিছিল। কিন্তু তেওঁ পৰ্বতাৰোহন এৰি দিয়া নাছিল। ২০১৬ চনৰ ২০ অক্টোবৰ তাৰিখে জাপানৰ কাৱাগৱেৰ চিকিৎসালয়ত তেওঁৰ মৃত্যু হয়।^৭

গুগল ডুডুল

২০১৯ চনৰ ২২ ছেপ্টেম্বৰ তাৰিখে গুগলেতেওঁৰ ৮০তম জন্মজয়ন্তীৰ উপলক্ষে এক বিশেষ ডুডুল প্ৰদৰ্শন কৰে। ইয়াৰ লগতে তেওঁৰ উৎসাহজনক নীতিবাক্য, "কেতিয়াও পৰাজয় বৰণ নকৰিবা, নিজৰ লক্ষ্য স্থিৰ ৰাখিবা" ডুডুলৰ লগত প্ৰদৰ্শন কৰিছিল।^৮৯

বাহ্যিক সংযোগ

• চেভেন চামিটৰ প্ৰফাইল