জামালা আল-বৈধানী

জামালা আল-বৈধানী (Jamala al-Baidhani, ১৯৭৭ – ১৫ ডিচেম্বৰ ২০১২) আছিল এগৰাকী য়েমেনৰ কৰ্মী যি মহিলা আৰু বিশেষভাৱে সক্ষম মহিলাসকলৰ নাগৰিক অধিকাৰৰ সমৰ্থন কৰিছিল। য়েমেনৰ প্ৰথমটো গোট আল-তাহাদী এছ’চিয়েশ্যন ফৰ ডিচেবলড ফিমেলছৰ তেওঁ প্ৰতিষ্ঠাপক, যিটো গোট বিশেষভাৱে সক্ষম ছোৱালীক সহায় কৰাৰ বাবে নিয়োজিত।^১

জীৱনী

য়েমেনৰ আল বাইধা অঞ্চলৰ আল এঅফ গাঁৱত আল-বৈধানীৰ জন্ম হৈছিল।^২ সাত বছৰ বয়সত মেনিনজাইটিছত আক্ৰান্ত হোৱালৈকে তেওঁ সক্ৰিয় শিশু আছিল৷ ৰোগৰ সৈতে জড়িত জটিলতাৰ বাবে তেওঁ পক্ষাঘাতগ্ৰস্ত হৈছিল। সুস্থ হোৱাৰ পিছত আল-বৈধানীয়ে ঘূৰি ফুৰিবলৈ হুইল চেয়াৰ ব্যৱহাৰ কৰে।^৩ ১৯৯৫ চনত তেওঁ সমাজ পৰিক্ৰমা মন্ত্ৰালয়ত কাম কৰিবলৈ আৰম্ভ কৰে আৰু কলেজলৈও যায়।^২ সমাজ বিজ্ঞানত তেওঁ স্নাতক ডিগ্ৰী লাভ কৰে।.^১

আল-বৈধানীয়ে ১৯৯৬ চনত য়েমেন চৰকাৰত অক্ষমতাৰ অধিকাৰৰ সৈতে কাম কৰিবলৈ আৰম্ভ কৰে,^২ কিন্তু পিছলৈ তেওঁ অনুভৱ কৰে যে চৰকাৰত কাম কৰাৰ সময়ত তেওঁ বিশেষভাৱে সক্ষম মহিলাসকলৰ বাবে সেৱা আগবঢ়োৱাৰ লক্ষ্যত উপনীত হ'ব পৰা নাই।^৩ য়েমেনত অক্ষমতা থকা বেছিভাগ লোকেই অক্ষম ব্যক্তি সংস্থা (DPO) আৰু বেচৰকাৰী সংস্থা (NGO)ৰ ওপৰত নিৰ্ভৰ কৰিব লাগিব।^৪ আল-বৈধানীয়ে ১৯৯৮ চনত ডিপিঅ' হিচাপে আল-তাহাদী প্ৰতিষ্ঠা কৰে।^১ ২০০৬ চনত তেওঁ যুৱ উন্নয়নৰ বাবে আলেছৰাৰ এন জি অ' গঠন কৰে, যিয়ে বিশেষভাৱে সক্ষমসকলৰ বাবে স্বেচ্ছাসেৱী কামৰ সমন্বয়ত সহায় কৰে।^১

২০০৭ চনত য়েমেনত থকা আমেৰিকাৰ দূতাবাসে তেওঁক "সাহসী মহিলা" হিচাপে সন্মান জনায়।^১ ২০০৮ চনত ছানাত থকা কুৱেইটৰ দূতাবাসে আল-বৈধানীক তেওঁৰ এন জি অ'ৰ কামৰ বাবে ৩০,০০০ ডলাৰ প্ৰদান কৰে।^৫

২০১২ চনত শ্বাস-প্ৰশ্বাসজনিত ৰোগৰ সৈতে জড়িত জটিলতাৰ বাবে ছানাত আল-বৈধানীৰ মৃত্যু হয়।^৬ তেওঁক মাজেল আল-ডেমা কবৰস্থানত সমাধিস্থ কৰা হয়।^৬ ২০১৩ চনত মৰণোত্তৰভাৱে আল-বৈধানীক দ্বিতীয়টো বালকুইছ বঁটা প্ৰদান কৰা হয়। এই বঁটাৰ জৰিয়তে "য়েমেনৰ মহিলাসকলৰ উন্নয়নত ব্যতিক্ৰমী অৱদান" আগবঢ়োৱা মহিলাসকলক সন্মান জনোৱা হয়।^৭