কেণ্ডিচ কিং

কেণ্ডিচ কিং (ইংৰাজী ভাষা: Candice King; জন্ম: ১৩ মে', ১৯৮৭) এগৰাকী আমেৰিকান অভিনেত্ৰী। তেওঁ দ্য ভেম্পায়াৰ ডায়েৰীছ আৰু ইয়াৰ স্পিন-অফ ধাৰাবাহিক দ্য অৰিজিনেলছ আৰু লেগেচিছত কেৰ'লিন ফৰ্বছৰ চৰিত্ৰত অভিনয় কৰাৰ বাবে অধিক পৰিচিত।

প্ৰাৰম্ভিক জীৱন

কেণ্ডিচ এক্কোলাৰ জন্ম ১৩ মে', ১৯৮৭ চনত টেক্সাছ ৰাজ্যৰ হিউষ্টনত হৈছিল। তেওঁ কেৰ’লিন ক্লাৰ্ক এক্কোলা নামৰ এগৰাকী পৰিৱেশ অভিযন্তা আৰু কেভিন এক্কোলা নামৰ এজন কাৰ্ডিঅ'থোৰাচিক শল্যচিকিৎসকৰ কন্যা।^১ তেওঁৰ পিতৃ-মাতৃ দুয়ো দক্ষিণ ইলিনইছৰ বাসিন্দা আছিল; পিতৃ কাৰ্বনডেল আৰু মাতৃ হেৰিনৰ।^১

তেওঁ ফ্ল’ৰিডাৰ এজউডত ডাঙৰ-দীঘল হয় আৰু অ’ৰলেণ্ড’স্থিত লেক হাইলেণ্ড প্ৰিপেৰেটৰী স্কুলত অধ্যয়ন কৰে।^২ তেওঁৰ এজন সৰু ভাতৃ আছে।^২৩

কেৰিয়াৰ

সংগীত

২০০৬ চনৰ ডিচেম্বৰত এক্কোলাই যুক্তৰাষ্ট্ৰত স্বতন্ত্ৰভাৱে তেওঁৰ প্ৰথম সংগীত এলবাম ‘’ইট্‌ছ অলৱেইজ দ্য ইনোসেণ্ট ৱান্‌ছ’’ প্ৰকাশ কৰে। এই এলবামখনৰ ১৪টা গীতৰ ভিতৰত ১২টা গীত তেওঁ সহ-ৰচনা কৰিছিল। বাকী দুটা গীত আছিল ‘টিল টিউজডে’ৰ জনপ্ৰিয় গীত ‘’ভয়েচেছ কেৰী’’ৰ এটা কভাৰ সংস্কৰণ আৰু আমেৰিকান হাই-ফাইৰ ‘’দ্য ব্ৰেকআপ ছং’’ৰ নাৰী সংস্কৰণ, যিটো ‘’আৱাৰ ব্ৰেকআপ ছং’’ শিৰোনামেৰে পুনৰলিখন কৰা হৈছিল। ২০০৮ চনত এলবামখন জাপানত পুনৰ-মুক্তি দিয়া হয় আৰু তাত অধিক সফলতা লাভ কৰে।

এক্কোলাই মাইলি চাইৰাছৰ ‘’বেষ্ট অৱ বথ ৱৰ্ল্ডছ ট্যুৰ’’ত পৃষ্ঠভূমি গায়িকা হিচাপে ভ্ৰমণ কৰিছিল। তেওঁ ২০০৮ চনৰ ত্ৰিমাত্ৰিক সংগীতানুষ্ঠান চলচ্চিত্ৰ ‘’হান্না মণ্টানা এণ্ড মাইলি চাইৰাছ: বেষ্ট অৱ বথ ৱৰ্ল্ডছ কনচাৰ্ট’’ত নিজৰ ৰূপতেই উপস্থিত হৈছিল।^৪৫

২০১১ চনৰ ফেব্ৰুৱাৰীত এক্কোলাই ‘’দ্য ভেম্পায়াৰ ডায়েৰীছ’’ ধাৰাবাহিকত দ্য বেংগ্লছৰ ‘’ইটাৰ্নেল ফ্লেম’’ গীতটো কভাৰ ৰূপে পৰিৱেশন কৰে।^৬৭

অভিনয়

এক্কোলাই হাউ আই মেট ইয়’ৰ মাদাৰ, ছুপাৰন্যাচাৰেল আৰু ড্ৰপ ডেড ডিভা আদি কেইবাখনো দূৰদৰ্শন ধাৰাবাহিকত অতিথি শিল্পী হিচাপে অভিনয় কৰিছিল। ২০০৯ চনৰ জুলাই মাহত তেওঁ ভয়ংকৰ চলচ্চিত্ৰ ‘’ডেডগাৰ্ল’’ত মুখ্য ভূমিকাত অভিনয় কৰে। এই চলচ্চিত্ৰখন দুজন উচ্চ বিদ্যালয়ৰ ছাত্ৰই পৰিত্যক্ত মানসিক চিকিৎসালয় এটাত এজনী অমৰ নাৰীক আৱিষ্কাৰ কৰাৰ কাহিনীৰ ওপৰত আধাৰিত।^৮ একে বছৰতে তেওঁ ‘’দ্য হান্না মণ্টানা মুভি’’ত সৰু ভূমিকাত অভিনয় কৰিছিল।

২০০৯ চনত তেওঁ দ্য চিডব্লিউৰ অতিপ্ৰাকৃত নাট্যধাৰাবাহিক ‘’দ্য ভেম্পায়াৰ ডায়েৰীছ’’ত অভিনয়ৰ বাবে নিৰ্বাচিত হয়। একে নামৰ গ্ৰন্থমালাৰ আধাৰত নিৰ্মিত এই ধাৰাবাহিকখনত এক্কোলাই কেৰ’লিন ফৰ্বছ নামৰ অন্যতম মুখ্য চৰিত্ৰত অভিনয় কৰে।^৪৯ এই ধাৰাবাহিকত তেওঁৰ অভিনয়ে তেওঁক দুটা টিন চয়েছ বঁটা লাভ কৰাত সহায় কৰে। ২০১২ চনৰ জুন মাহত তেওঁ ৱেব ধাৰাবাহিক ‘’ডেটিং ৰুলছ ফ্ৰম মাই ফিউচাৰ ছেল্‌ফ’’ৰ দ্বিতীয় ঋতুত ক্ল’ই কানিংহাম নামৰ ২৬বছৰীয়া নাৰীৰ ভূমিকাত অভিনয় কৰে।^১০১১ এই ধাৰাবাহিকখন এজনী ছোৱালীয়ে নিজৰ ভৱিষ্যতৰ দশ বছৰ পিছৰ নিজকে পৰা টেক্ষ্ট বাৰ্তাৰ জৰিয়তে প্ৰেম-সম্পৰ্কীয় উপদেশ লাভ কৰাৰ কাহিনীৰ ওপৰত আধাৰিত।

২০১৮ চনত এক্কোলাই ‘’দ্য অৰিজিনেলছ’’ৰ অন্তিম ঋতুত পুনৰ কেৰ’লিন ফৰ্বছৰ চৰিত্ৰত অভিনয় কৰে।^১২

২০১৯ চনৰ আগষ্ট মাহত ঘোষণা কৰা হয় যে ২০২০ চনৰ ৰোমাঞ্চধৰ্মী চলচ্চিত্ৰ ‘’আফ্টাৰ উই ক’লাইডেড’’ত তেওঁ কিম্বাৰ্লী নামৰ চৰিত্ৰত অভিনয় কৰিব।^১৩১৪

২০২২ চনত তেওঁ ‘’লেগেচিছ’’ৰ অন্তিম ঋতুত পুনৰ কেৰ’লিন ফৰ্বছৰ ভূমিকাত অভিনয় কৰে।^১৫

ব্যক্তিগত জীৱন

দ্য ভেম্পায়াৰ ডায়েৰীছ-ৰ সহ-অভিনেতা মাইকেল ট্ৰেভিনো আৰু ইয়ান সোমাৰহাল্ডাৰৰ সৈতে কেণ্ডিচ এক্কোলাই ইট গেটছ বেটাৰ প্ৰজেক্টক সমৰ্থন কৰে। এই সংস্থাটোৱে এলজিবিটি কিশোৰ-কিশোৰীৰ আত্মহত্যা প্ৰতিৰোধৰ লক্ষ্যৰে কাম কৰে।^১৬

২০১২ চনৰ ফেব্ৰুৱাৰীত এক ছুপাৰ ব'ল অনুষ্ঠানত সাক্ষাৎ হোৱাৰ পিছত এক্কোলাই সংগীতজ্ঞ জো কিংৰ সৈতে সম্পৰ্ক আৰম্ভ কৰে।^১৭ সহ-অভিনেত্ৰী নিনা ডব্ৰেভে তেওঁলোকৰ পৰিচয় কৰাই দিছিল। ২০১৩ চনৰ মে' মাহত তেওঁলোকৰ বাগদান সম্পন্ন হয়,^১৮ আৰু ১৮ অক্টোবৰ, ২০১৪ তাৰিখে লুইজিয়ানাৰ নিউ অৰলিন্সত তেওঁলোক বিবাহসূত্ৰে আবদ্ধ হয়। এক্কোলা জো কিংৰ পূৰ্বৰ বিবাহৰ দুগৰাকী কন্যাৰ সত্মাতা হয়।

এক্কোলাৰ দুগৰাকী জীয়াৰী আছে; প্ৰথমজনীৰ জন্ম ২০১৬ চনৰ জানুৱাৰীত,^১৯ আৰু দ্বিতীয়জনীৰ জন্ম ২০২০ চনৰ ডিচেম্বৰত।^২০ ২০২২ চনৰ মে' মাহত এক্কোলাই বিবাহ বিচ্ছেদৰ বাবে আবেদন কৰে, যদিও তেওঁ কিং উপাধি বজাই ৰাখে।^২১

২০২৩ চনৰ ডিচেম্বৰত এক্কোলাই নিশ্চিত কৰে যে তেওঁ আমেৰিকান অভিনেতা ষ্টিভেন ক্ৰুগাৰৰ সৈতে সম্পৰ্কত আছে।^২২২৩ ১৪ মে', ২০২৫ তাৰিখে তেওঁলোকে নিজৰ বাগদান ঘোষণা কৰে। ৮ ডিচেম্বৰ, ২০২৫ তাৰিখে এক্কোলাই তৃতীয় সন্তানৰ গৰ্ভধাৰণৰ কথা ঘোষণা কৰে।^২৪