একিকিবি (ইংৰাজী ভাষা: Ekikibi) হৈছে বাকোঞ্জো জনগোষ্ঠীৰ এটা পৰম্পৰাগত প্ৰেমমূলক নৃত্য। এই জনগোষ্ঠী পশ্চিম উগাণ্ডা আৰু পূৰ্ব গণতান্ত্ৰিক কংগো প্ৰজাতন্ত্ৰত অৱস্থিত ৰুৱেনজোৰি পৰ্বতমালা অঞ্চলত বসবাস কৰে।১২
বাকোঞ্জোসকল বান্টু ভাষা পৰিয়ালৰ অন্তৰ্গত এটা জনগোষ্ঠী, যিসকল মূলতঃ ৰুৱেনজোৰি অঞ্চলৰ কাছেছ, বুন্দিবুগ্যো, বুন্যাংগাবু আৰু ন্টোৰোকো জিলাত বসবাস কৰে।৩
এই নৃত্য সাধাৰণতে বিবাহ আৰু অন্যান্য আনন্দোৎসৱত পৰিবেশন কৰা হয় আৰু ইয়াত দৰা-কইনাৰ আনন্দ, প্ৰেম আৰু স্নেহ প্ৰকাশ পায়।৪৫৬
ইতিহাস
একিকিবি নৃত্যৰ প্ৰেৰণা পানীত মাছৰ চলাচলৰ পৰা লোৱা বুলি বিশ্বাস কৰা হয়, যাক বাকোঞ্জো লোকসকলে পৰ্যবেক্ষণ কৰি প্ৰশংসা কৰিছিল। এই নৃত্য পৰ্বতীয়া পৰিৱেশ আৰু অঞ্চলটোৰ সংস্কৃতিৰ দ্বাৰা প্ৰভাৱিত। শতাব্দীজুৰি এই নৃত্য প্ৰজন্মৰ পৰা প্ৰজন্মলৈ প্ৰচলিত হৈ আহিছে আৰু ই বাকোঞ্জো জনগোষ্ঠীৰ পৰিচয় আৰু ঐতিহ্যৰ এক গুৰুত্বপূৰ্ণ প্ৰতীক হিচাপে গণ্য।৪৭
পৰিবেশন
একিকিবি সাধাৰণতে আঠজন নৃত্যশিল্পীৰ এটা দলে পৰিবেশন কৰে, য’ত সাধাৰণতে চাৰি জন পুৰুষ আৰু চাৰি জন মহিলা অন্তৰ্ভুক্ত থাকে। নৃত্যশিল্পীসকলে ৰঙীন পৰম্পৰাগত পোছাক আৰু অলংকাৰ পৰিধান কৰে। এই নৃত্য প্ৰেমগীত, ঢোল, বাঁহী আৰু ঝুনঝুনীৰ দৰে বাদ্যযন্ত্ৰৰ সৈতে সম্পন্ন হয়।
নৃত্যশিল্পীসকলে বৃত্তাকাৰ গঠনত নাচে, য’ত পুৰুষসকল বাহিৰফালে আৰু মহিলাসকল ভিতৰফালে থাকে। তালবদ্ধ খোজ, জঁপিওৱা, ঘূৰণি আৰু মৰা-মুৰা এই নৃত্যৰ বৈশিষ্ট্য, যিবোৰে পানীত মাছৰ চলন অনুকৰণ কৰে। চকুৰ ইশাৰা আৰু অংগভংগীৰ জৰিয়তে নৃত্যশিল্পীসকলে নিজৰ অনুভৱ আৰু আবেগ প্ৰকাশ কৰে।৫৮
গুৰুত্ব
একিকিবি নৃত্য প্ৰেম, বিবাহ আৰু সুখৰ উদযাপন। ই দৰা-কইনা আৰু দুয়োটা পৰিয়ালৰ মাজৰ সম্পৰ্ক আৰু সমন্বয় প্ৰকাশ কৰে। এই নৃত্যৰ জৰিয়তে পূৰ্বপুৰুষ আৰু দেৱতাসকলক সন্মান জনোৱা হয়, যিসকলে বিবাহিত জীৱন আশীৰ্বাদ কৰে বুলি বিশ্বাস কৰা হয়।
একিকিবি নৃত্য বাকোঞ্জো সংস্কৃতিৰ সৌন্দৰ্য আৰু সমৃদ্ধিৰ প্ৰতিফলন আৰু ই জনগোষ্ঠীটোৰ বাবে গৌৰৱ আৰু আনন্দৰ উৎস।৪৮৭৬
তথ্যসূত্ৰ
- ↑ Bakonjo People and Culture. Bakonzo, Rwenzururu & Rwenzori. Inside Rwenzori Mountains National Park
- ↑ (2020-05-30). The Bakonzo & Bamba. Kitara Foundation for Regional Tourism
- ↑ (2020-07-19). Bakonzo, Basongora need to make concessions on Kasese District split. Monitor
- ↑ Continuity and Change in Bakonzo Music. art.torvergata.it
- ↑ (2021-01-09). Minority ethnic groups battle to preserve their heritage. Monitor
- ↑ Cooke, Peter; Doornbos, Martin. (1982). Rwenzururu Protest Songs. Africa: Journal of the International African Institute. পৃ. 37–60
- ↑ Facci, Serena. (July 2009). Dances across the boundary: Banande and Bakonzo in the twentieth century. Journal of Eastern African Studies. পৃ. 350–366
- ↑ Facci, Serena; Nannyonga-Tamusuza, Sylvia. Rwenzori: Histories and Cultures of an African Mountain
উৎস আৰু অনুজ্ঞাপত্ৰ
উৎস: অসমীয়া ৱিকিপিডিয়া। এই প্ৰবন্ধটো অসমীয়া ৱিকিপিডিয়াৰ “একিকিবি” প্ৰবন্ধৰ সংশোধন ৫৭৩৩১১ (২ ফেব্ৰুৱাৰী ২০২৬)ৰ পৰা আনি অসমীয়া বিশ্বকোষৰ গাঁথনিলৈ ৰূপান্তৰ কৰা হৈছে। মূল লেখকসকলৰ তালিকা সম্পাদনা-ইতিহাসত উপলব্ধ। পাঠ্য CC BY-SA 4.0।