আন্দ্ৰেয়া চেভেজ

আন্দ্ৰেয়া ক্ৰীষ্টেন চেভেজ (ইংৰাজী: Andrea Kristen Savage; জন্ম: ২০ ফেব্ৰুৱাৰী, ১৯৭৩)^১ এগৰাকী আমেৰিকান অভিনেত্ৰী আৰু কমেডিয়ান, যিয়ে ‘‘আই এম ছৰী’’ (২০১৭–২০১৯) শ্ব’ৰ সৃষ্টি, লিখা আৰু অভিনয়ৰ বাবে বিশেষভাৱে পৰিচিত। প্ৰথমতে অনুষ্ঠানটো ট্ৰুটিভিত প্ৰচাৰিত হৈছিল যদিও পিছলৈ নেটফ্লিক্সত প্ৰচাৰ হোৱাৰ সময়ত ই যথেষ্ট জনপ্ৰিয়তা লাভ কৰে। ২০২২ চনত তেওঁ ‘‘টালছা কিং’’ ধাৰাবাহিকত চিলভেষ্টাৰ ষ্টেলনৰ বিপৰীতে ষ্টেচি বিলৰ চৰিত্ৰত অভিনয় কৰে, যি পেৰামাউণ্ট+ত প্ৰচাৰিত হৈছিল। সেই বছৰতে তেওঁ নেটফ্লিক্সত ‘‘লুক বথ ৱেজ’’ আৰু পেৰামাউণ্ট+ত ‘‘বিভিছ আৰু বাট-হেড ডু দ্য ইউনিভাৰ্ছ’’ চলচ্চিত্ৰতো অভিনয় কৰে। চেভেজ কমেডী চেণ্ট্ৰেলৰ মক্যুমেণ্টেৰী ধাৰাবাহিক ‘‘ডগ বাইটছ মেন’’ (২০০৬), কমেডী ছবি ‘‘ষ্টেপ ব্ৰাদাৰ্ছ’’ (২০০৮), হুলুৰ ৰিয়েলিটি টিভি পেৰ’ডি ধাৰাবাহিক ‘‘দ্য হটৱাইভছ’’ (২০১৪–২০১৫), আৰু এইচবিঅ’ৰ কমেডী ‘‘ভিপ’’ (২০১৬–২০১৭) আদি প্ৰকল্পত অভিনয়ৰ বাবেও পৰিচিত। ইয়াৰ উপৰি তেওঁ ‘‘কাৰ্ব ইউৰ এন্থুজিয়াম’’ ধাৰাবাহিকতো অভিনয় কৰিছে।

প্ৰাথমিক জীৱন আৰু শিক্ষা

আন্দ্ৰেয়া ক্ৰীষ্টেন চেভেজে ১৯৭৩ চনৰ ২০ ফেব্ৰুৱাৰীত আমেৰিকাৰ কেলিফৰ্ণিয়া ৰাজ্যৰ সান্তা মনিকাত জন্মগ্ৰহণ কৰে।^১ তেওঁ শৈশৱকাল লছ এঞ্জেলেছ অঞ্চলত কটায় আৰু কম বয়সৰেপৰাই অভিনয় আৰু হাস্যৰসাত্মক শিল্পৰ প্ৰতি আগ্ৰহ প্ৰকাশ কৰে। তেওঁ কৰ্নেল বিশ্ববিদ্যালয়ত অধ্যয়ন কৰে আৰু চৰকাৰ বিষয়ত স্নাতক (বিএ) ডিগ্ৰী লাভ কৰে।^২ বিশ্ববিদ্যালয়ত অধ্যয়নৰ সময়ছোৱাত তেওঁ থিয়েটাৰ আৰু কমেডীৰ সৈতে সক্ৰিয়ভাৱে জড়িত আছিল, যিয়ে পিছলৈ তেওঁৰ অভিনয় জীৱনৰ ভেটি স্থাপন কৰে।

কেৰিয়াৰ

চেভেজে অভিনয় জীৱন আৰম্ভ কৰে ছুইট ভেলী হাই ধাৰাবাহিকত ব্ৰাজিলীয় এক্সচেঞ্জ ছাত্ৰী ৰেনাটা ভাৰ্গাছৰ চৰিত্ৰত অভিনয় কৰি। ইয়াৰ কিছুদিন পাছতে তেওঁ দ্য গ্ৰাউণ্ডলিংছ থিয়েটাৰত যোগদান কৰে,^৩৪ আৰু সাপ্তাহিকভাৱে তেওঁলোকৰ কোম্পানীত অভিনয় কৰে। তেওঁ চিগনিফিকেণ্ট অদাৰছ ধাৰাবাহিকত চেলছি আৰু ডগ বাইটছ মেনত টিলি চুলিভানৰ মুখ্য চৰিত্ৰত অভিনয় কৰে। তাৰ পিছত তেওঁ ষ্টেপ ব্ৰাদাৰ্ছ ছবিত উইল ফেৰেলৰ বিপৰীতে ডেনিছৰ চৰিত্ৰত অভিনয় কৰে আৰু পিছলৈ ফেৰেল, জেক গালিফিয়ানাকিছ, ডেমেট্ৰি মাৰ্টিন আৰু নিক শ্বৱাৰ্ডছনৰ সৈতে কমেডী ভ্ৰমণত অংশগ্ৰহণ কৰে।^৫ তেওঁ ২০০৮ চনত দ্য গ্ৰেণ্ড ছবিত ৱুডি হেৰেলছনৰ সৈতে অভিনয় কৰে।

সন্তান জন্মৰ বাবে কিছুসময়ৰ বিৰতি লোৱাৰ পাছত ২০১০ চনত তেওঁ ডিনাৰ ফৰ শ্মাকছ ছবিত অভিনয় কৰে। তেওঁ এনবিচিৰ বাবে টম লেনন আৰু বেন গাৰাণ্টে নিৰ্মাণ কৰা দ্য ষ্ট্ৰিপ আৰু এফএক্সৰ বাবে পুনৰ নিৰ্মিত অষ্ট্ৰেলীয় ডাৰ্ক কমেডী উইলফ্ৰেড ধাৰাবাহিকৰ পাইলট পৰ্বতো অভিনয় কৰে। ইয়াৰ উপৰি তেওঁ এইচবিঅ'ৰ ফানি অৰ ডাই প্ৰেজেণ্টছৰ বাবে চুটি কমেডী ভিডিঅ' নিৰ্মাণ আৰু অভিনয় কৰে,^৬ লগতে “হলিউডৰ লেডিজ ৰুমছৰপৰা প্ৰকৃত কথোপকথনৰ পুনৰভিনয়” শীৰ্ষক ধাৰাবাহিকো কৰে। তেওঁ ষ্টাৰ্জৰ পাৰ্টি ডাউন ধাৰাবাহিকতো দেখা গৈছিল।

২০১২ চনত তেওঁ ব্যংগাত্মক জনসেৱা বিজ্ঞাপন ৰিপাব্লিকানছ, গেট ইন মাই ভেজাইনা লিখি, পৰিচালনা কৰি আৰু অভিনয় কৰে, যাৰ প্ৰিমিয়াৰ হয় ৰিয়েল টাইম উইথ বিল মাহেৰ অনুষ্ঠানত। ২০১৩ চনত তেওঁ এবিচি আৰু কমেডী চেণ্ট্ৰেলৰ বাবে পাইলট লিখে আৰু গেৰী ছানচেজ প্ৰডাকচনৰ সৈতে কাম কৰে।

২০১৬ চনত তেওঁ এইচবিঅ'ৰ ভিপ ধাৰাবাহিকত চিনেটৰ (পিছলৈ ৰাষ্ট্ৰপতি) ল'ৰা মণ্টেজ হিচাপে অভিনয় আৰম্ভ কৰে। সেই বছৰতে তেওঁ কাৰ্ব ইউৰ এনথুজিয়ামতো অভিনয় কৰে।

২০১৭ চনত তেওঁ অৰ্ধ-আত্মজীৱনীমূলক কমেডী আই এম ছৰী সৃষ্টি কৰে আৰু মুখ্য চৰিত্ৰত অভিনয় কৰে।^৭ এই ধাৰাবাহিকখন ২০১৭ চনৰ ১২ জুলাইত প্ৰিমিয়াৰ হয় আৰু পিছলৈ নেটফ্লিক্সতো প্ৰচাৰিত হয়। কভিড-১৯ মহামাৰীৰ বাবে পৰিকল্পিত তৃতীয় ছিজন বাতিল কৰা হয়।^৮

২০১৯ চনত তেওঁ “আন্দ্ৰেয়া চেভেজ: এ গ্ৰ'ন-আপ উইমেন #buttholes” শীৰ্ষক এটা প’ডকাষ্ট আৰম্ভ কৰে। ২০২২ চনত তেওঁ টালছা কিং ধাৰাবাহিকত ষ্টেচি বিলৰ চৰিত্ৰত চিলভেষ্টাৰ ষ্টেলনৰ বিপৰীতে অভিনয় কৰে। সেই বছৰতে তেওঁ লুক বথ ৱেজ আৰু বিভিছ আৰু বাট-হেড ডু দ্য ইউনিভাৰ্ছ ছবিতো অভিনয় কৰে।

ফিল্ম'গ্ৰাফি

চলচ্চিত্ৰ

আন্দ্ৰিয়া ছাভেজৰ চলচ্চিত্ৰ কৰ্ম

দূৰদৰ্শন

আন্দ্ৰিয়া ছাভেজৰ দূৰদৰ্শন কৰ্ম