অম্ৰুতা ফাদনবিছ

অম্ৰুতা ফাদনবিছ (Amruta Fadnavis; জন্ম: ৯ এপ্ৰিল ১৯৭৯) এগৰাকী ভাৰতীয় বেংকাৰ, অভিনেত্ৰী, গায়িকা আৰু সমাজ কৰ্মী আৰু মহাৰাষ্ট্ৰৰ বৰ্তমানৰ মুখ্যমন্ত্ৰী দেৱেন্দ্ৰ ফাদনবিছৰ পত্নী। তেওঁ এক্সিছ বেংকৰ উপাধ্যক্ষ পদত অধিষ্ঠিত।^১২ আন্তঃৰাষ্ট্ৰীয় খ্ৰীষ্টান বিশ্বাস ভিত্তিক সমাৱেশ ‘নেচনেল প্ৰেয়াৰ ব্ৰেকফাষ্ট ২০১৭’ত তেওঁ ভাৰতক প্ৰতিনিধিত্ব কৰিছিল।^৩৪৫

প্ৰাৰম্ভিক আৰু কৰ্মজীৱন

১৯৭৯ চনৰ ৯ এপ্ৰিলত মহাৰাষ্ট্ৰৰ নাগপুৰত অম্ৰুতা ৰানাডে নামেৰে জন্মগ্ৰহণ কৰে। তেওঁৰ দেউতাক চকু চিকিৎসক শৰদ ৰানাদে আৰু মাক স্ত্ৰীৰোগ বিশেষজ্ঞ চাৰুলতা ৰানাদে। তেওঁ নাগপুৰৰ ছেইণ্ট জোচেফ কনভেণ্ট স্কুলত অধ্যয়ন কৰিছিল। অম্ৰুতা ১৬ বছৰৰ তলৰ ৰাজ্যিক পৰ্যায়ৰ টেনিছ খেলুৱৈ আছিল।^৬ নাগপুৰৰ জি.এছ কলেজ অৱ কমাৰ্চ এণ্ড ইকনমিক্সৰ পৰা স্নাতক ডিগ্ৰী লয়। পিছলৈ তেওঁ ফাইনেঞ্চত এম বি এ ডিগ্ৰী লাভ কৰে আৰু পুনেৰ চিম্বায়'ছিছ ল স্কুলত কৰ আইন অধ্যয়ন কৰে।^৭

২০০৩ চনত ফাদনাবিছে এক্সিছ বেংকৰ কাৰ্যবাহী কেচিয়াৰ হিচাপে নিজৰ কেৰিয়াৰ আৰম্ভ কৰে আৰু তাৰ পিছত নাগপুৰত এক্সিছ বেংকৰ ব্যৱসায়িক শাখাৰ নেতৃত্ব দিয়ে।^৮