ৰোমা আগৰৱালা

ৰোমা আগৰৱালা লণ্ডনত বাস কৰা এগৰাকী ভাৰতীয়-ব্ৰিটিছ চাৰ্টাৰ্ড ষ্ট্ৰাকচাৰেল ইঞ্জিনিয়াৰ। তেওঁ শ্বাৰ্ডকে ধৰি কেইবাটাও ডাঙৰ অভিযান্ত্ৰিক প্ৰকল্পত কাম কৰিছে। আগৰৱালা এগৰাকী লেখিকা আৰু বৈচিত্ৰ্য অভিযানকাৰীও, অভিযান্ত্ৰিক ক্ষেত্ৰত মহিলাসকলক উৎসাহিত কৰে।

প্ৰাথমিক জীৱন আৰু শিক্ষা

লণ্ডনলৈ যোৱাৰ আগতে ১৯৮৩ চনত ভাৰতৰ মুম্বাইত জন্মগ্ৰহণ কৰিছিল আগৰৱালাই।^১ নিউয়ৰ্কৰ ইথাকাতো পাঁচ বছৰ বাস কৰিছিল।^২ নৰ্থ লণ্ডন কলেজিয়েট স্কুলত এ লেভেল সম্পূৰ্ণ কৰে। ২০০৪ চনত অক্সফৰ্ড বিশ্ববিদ্যালয়ৰপৰা পদাৰ্থ বিজ্ঞানত বি এ ডিগ্ৰী লাভ কৰে, আৰু ২০০৫ চনত ইম্পেৰিয়েল কলেজ লণ্ডনৰপৰা ষ্ট্ৰাকচাৰেল ইঞ্জিনিয়াৰিঙত এম এছ চি ডিগ্ৰী লাভ কৰে।

আগৰৱালাই অভিযান্ত্ৰিকতাৰ প্ৰতি থকা উৎসাহৰ কাৰণ তেওঁৰ বস্তু সজা(আৰু ভাঙি পেলোৱা)ৰ প্ৰেম বুলি কয়, যিটো সৰুতে লেগোৰ সামগ্ৰীৰ সৈতে খেলি সৃষ্টি হৈছিল।^৩ আগৰৱালাই অভিযান্ত্ৰিক ক্ষেত্ৰখনত প্ৰৱেশৰ কাৰণ অক্সফৰ্ড পদাৰ্থ বিজ্ঞান বিভাগত গ্ৰীষ্মকালীন প্লেচমেণ্টৰ বাবে বুলি কয় য'ত তেওঁ চাৰ্নৰ বাবে কণা ডিটেক্টৰ ডিজাইন কৰা অভিযন্তাৰ সৈতে কাম কৰিছিল।^৪

কেৰিয়াৰ

২০০৫ চনত আগৰৱালে পাৰ্ছনছ ব্ৰিংকাৰহফ (পিছলৈ ডব্লিউ এছ পি বুলি কোৱা হয়)ত স্নাতক কাৰ্যসূচীত যোগদান কৰে, ২০১১ চনত ইনষ্টিটিউচন অৱ ষ্ট্ৰাকচাৰেল ইঞ্জিনিয়াৰৰ চাৰ্টাৰ্ড ইঞ্জিনিয়াৰ হয়। ছয় বছৰ ধৰি তেওঁ পশ্চিম ইউৰোপৰ আটাইতকৈ ওখ অট্টালিকা শ্বাৰ্ডৰ কাম কৰিছিল, ভেটি আৰু আইকনিক শিখৰৰ ডিজাইন কৰিছিল।^৫ তেওঁ এই প্ৰকল্পটোক কেৰিয়াৰৰ হাইলাইট হিচাপে বৰ্ণনা কৰিছে: "মই ভাবোঁ যে আপোনাৰ কেৰিয়াৰত এনে প্ৰকল্প মাত্ৰ এবাৰ বা দুবাৰহে আহে, গতিকে মই নিজকে অতি সৌভাগ্যৱতী বুলি অনুভৱ কৰোঁ যে মই এইটোৰ ওপৰত কাম কৰাৰ সুযোগ পাইছোঁ।"^৬ ১,০১৬ ফুট (৩১০ মিটাৰ) উচ্চতাৰ এই গঠনটোৰ বাবে ওপৰৰপৰা তললৈ নিৰ্মাণ পদ্ধতিৰ প্ৰয়োজন আছিল, যিটো এই পৰিসৰৰ অট্টালিকাত আগতে কেতিয়াও কৰা হোৱা নাছিল।^৭ এই শিখৰটোৰ বাবে মডিউলাৰ নিৰ্মাণৰ প্ৰয়োজন আছিল যিটো অফ-ছাইটত নিৰ্মাণ আৰু পৰীক্ষা কৰিব পৰা যায়, যাৰ ফলত মধ্য লণ্ডনত উচ্চতাত দ্ৰুত আৰু নিৰাপদভাৱে সংযোগ কৰিব পৰা যায়।^৮

শ্বাৰ্ডৰ সমান্তৰালভাৱে আগৰৱালাই ক্ৰিষ্টাল পেলেচ ষ্টেচন আৰু নৰ্থামব্ৰিয়া ইউনিভাৰ্চিটি ফুটব্ৰিজৰ কাম কৰিছিল। ২০১৫ চনৰ নৱেম্বৰ মাহত ইণ্টাৰচাৰ্ভত ডিজাইন মেনেজাৰ হিচাপে যোগদান কৰাৰ পাছত তেওঁ দহ বছৰ ডব্লিউ এছ পিৰ বাবে কাম কৰিছিল।^৯ ২০১৭ চনৰ মে' মাহত আগৰৱালাই এচিঅ'মত সহযোগী সঞ্চালক হিচাপে যোগদান কৰে।^১০

২০১৮ চনত আগৰৱালাক ব্ৰিটিছ সাম্ৰাজ্যৰ অৰ্ডাৰ (এম বি ই)ৰ সদস্য হিচাপে নিযুক্তি দিয়া হয়।^১১ ২০১৮ চনত ইনষ্টিটিউচন অৱ চিভিল ইঞ্জিনিয়াৰৰ ফেলো হিচাপে নিযুক্তি দিয়া হয় আৰু ২০২১ চনত ৰয়েল একাডেমী অৱ ইঞ্জিনিয়াৰিঙৰ সন্মানীয় ফেলো নিৰ্বাচিত হয়।^১২