লায়াল আবুদ

লায়াল মুনিৰ আবুদ (ইংৰাজী ভাষা: Layal Abboud; জন্ম ১৫ মে' ১৯৮২) এগৰাকী লেবানিজ পপ গায়িকা, লোকসংগীত শিল্পী, শব্দ-গীতিকবি, নৃত্যশিল্পী, ফিট মডেল আৰু মুছলমান মানৱতাবাদী।^১২৩

লেবাননৰ দক্ষিণ প্ৰদেশৰ টায়াৰ জিলাৰ কনিছাহ নামৰ গাঁৱৰ এটা সংগীত পৰিয়ালত জন্মগ্ৰহণ কৰা আবুদ এগৰাকী প্ৰাক্তন আভ্যন্তৰীণ নিৰাপত্তা বাহিনীৰ আৰক্ষী বিষয়া আছিল। তেওঁ লেবানিজ বিশ্ববিদ্যালয়ত ইংৰাজী সাহিত্য, বেইৰুত আৰব বিশ্ববিদ্যালয়ত অনুবাদ আৰু আমেৰিকান ইউনিভাৰ্চিটি অৱ চাইন্স এণ্ড টেকন’লজীত সংগীতৰ অভিব্যক্তিৰ বিষয়ে অধ্যয়ন কৰিছিল। তেওঁ ২০০১ চনৰ পৰা ২০০২ চনলৈ এগৰাকী দক্ষিণ লেবানিজ প্ৰতিযোগী হিচাপে ষ্টুডিঅ' এল-ফান শৃংখলাৰ জৰিয়তে পোনপ্ৰথমবাৰৰ বাবে আত্মপ্ৰকাশ কৰিছিল। ২০০৭ চনৰ শেষৰ ফালে মুক্তি পোৱা তেওঁৰ প্ৰথম এলবাম ফি শ্বৌক্-ৰ জৰিয়তে আবুদৰ সংগীত কেৰিয়াৰ বিকশিত হয়।^৪ বিভিন্ন আৰবী উপভাষাত গীত গোৱা আবুদ লেবানিজ লোকসংগীতৰ উপস্থাপন আৰু গ্ৰীষ্মকালীন সংগীতানুষ্ঠান তথা ভ্ৰমণৰ বাবে বিখ্যাত।^৫ তেওঁ লেবাননৰ পেছাদাৰী শিল্পী সন্থাৰ এগৰাকী গায়িকা সদস্য।^৬

প্ৰাৰম্ভিক জীৱন আৰু শিক্ষা

লায়াল আবুদৰ জন্ম লেবাননৰ টায়াৰ জিলাৰ দক্ষিণৰ গাঁও কনিছাহৰ এটা ডাঙৰ চিয়া মুছলমান পৰিয়ালত হৈছিল। আবুদৰ পিতৃ-মাতৃ মুনিৰ আৰু মৰিয়মৰ মুঠ তিনিজন পুত্ৰ আৰু ছয়গৰাকী কন্যা সন্তান আছিল। সৰুৰে পৰাই আবুদে গীত গাবলৈ আৰু নৃত্য কৰিবলৈ আৰম্ভ কৰিছিল আৰু তেওঁ মিচৰৰ পপ গায়ক আমৰ ডিয়াবৰ এগৰাকী অনুৰাগী আছিল।^১৭ তেওঁৰ দেউতাকে তেওঁক উৎসাহিত কৰিছিল আৰু ছয় বছৰ বয়সত তেওঁক এটা বেহেলা কিনি দিছিল।^৮ ১৪ বছৰ বয়সৰ পৰাই তেওঁ ১৩ জনতকৈও অধিক ছাত্ৰ-ছাত্ৰীক ঘৰুৱা শিক্ষক হিচাপে পাঠদান কৰিছিল।^{৯১০১১}

আবুদে লেবানিজ বিশ্ববিদ্যালয়ত ইংৰাজী সাহিত্য আৰু বেইৰুত আৰব বিশ্ববিদ্যালয়ত অনুবাদ অধ্যয়ন কৰি স্নাতকোত্তৰ ডিগ্ৰী লাভ কৰে।^১২ ইয়াৰ পিছত তেওঁ লেবানিজ নেচনেল হায়াৰ কনজাৰভেটৰী অৱ মিউজিকত দুবছৰ ধৰি সংগীত অধ্যয়ন কৰে।

আবুদে লেবানিজ আৰক্ষী বাহিনীৰ এজন বিষয়া হিচাপে সেৱা আগবঢ়াইছিল আৰু বেইৰুত-ৰফিক হৰিৰি আন্তঃৰাষ্ট্ৰীয় বিমানবন্দৰৰ পৰিদৰ্শন বিভাগত দুবছৰ ধৰি নিৰাপত্তাৰ কাম কৰিছিল।^১৩১৪