মিত্ৰা দত্ত

মিত্ৰ দত্ত ( Mitra Dutta; জন্ম ১৯৫৩ ) এগৰাকী ভাৰতীয়-আমেৰিকান পদাৰ্থবিজ্ঞানী আৰু ইলেক্ট্ৰনিক্স অভিযন্তা, যি অপ্টোইলেক্ট্ৰনিকছৰ গৱেষণাৰ বাবে পৰিচিত। তেওঁ চিকাগোৰ ইলিনয় বিশ্ববিদ্যালয়ৰ বৈদ্যুতিক আৰু কম্পিউটাৰ অভিযান্ত্ৰিক বিভাগৰ বিশিষ্ট অধ্যাপিকা আৰু বিশ্ববিদ্যালয়খনৰ গৱেষণাৰ প্ৰাক্তন উপাচাৰ্য।

শিক্ষা আৰু কেৰিয়াৰ

গুৱাহাটী বিশ্ববিদ্যালয়ৰপৰা স্নাতক ডিগ্ৰী লাভ কৰা দত্তই দিল্লী বিশ্ববিদ্যালয়ৰপৰা পদাৰ্থ বিজ্ঞানত স্নাতকোত্তৰ ডিগ্ৰী লাভ কৰিছে। তেওঁ চিনচিনাটি বিশ্ববিদ্যালয়ৰপৰা পদাৰ্থ বিজ্ঞানত দ্বিতীয় স্নাতকোত্তৰ ডিগ্ৰী আৰু পি এইচ ডি লাভ কৰে।

পাৰ্ডু বিশ্ববিদ্যালয়, নিউয়ৰ্কৰ চিটি কলেজ আৰু ব্ৰুকহেভেন নেচনেল লেবৰেটৰীৰ পোষ্ট ডক্টৰেট গৱেষক হিচাপে কৰ্মৰত আছিল আৰু তাৰ পিছত তেওঁ দলৰ নেত্ৰী আৰু শেষত আমেৰিকা যুক্তৰাষ্ট্ৰৰ সেনা গৱেষণাগাৰৰ পদাৰ্থ বিজ্ঞানৰ বিভাগীয় সঞ্চালিকা হৈছিল। ১৯৯৬ চনত তেওঁ ইলেক্ট্ৰনিক্স বিভাগৰ মুৰব্বী আৰু পিছলৈ গৱেষণা প্ৰযুক্তি আৰু সংহতিৰ সঞ্চালিকা হিচাপে সেনাবাহিনীৰ গৱেষণা কাৰ্যালয়লৈ গুচি যায়।

২০০১ চনত দত্তই চিকাগোৰ ইলিনয় বিশ্ববিদ্যালয়লৈ গুচি যায়, আৰু ২০০৪ চনত তেওঁক বিশিষ্ট অধ্যাপক হিচাপে নিযুক্তি দিয়া হয়। ২০০১ চনত নিযুক্তি পোৱাৰপৰা ২০১২ চনত গৱেষণাৰ উপাচাৰ্য হিচাপে নিযুক্তি পোৱালৈকে তেওঁ দহ বছৰতকৈও অধিক সময় বৈদ্যুতিক আৰু কম্পিউটাৰ অভিযান্ত্ৰিক বিভাগৰ মুৰব্বী আছিল। ২০১৮ চনত তেওঁ ভাইচ চেন্সেলৰ পদৰপৰা পদত্যাগ কৰে আৰু তেওঁৰ পিছত জিনীয় বিজ্ঞানী জোয়ানা গ্ৰ'ডেনে কাৰ্যভাৰ গ্ৰহণ কৰে।

কিতাপ

দত্ত ফ’ননছ ইন নেন’ষ্ট্ৰাকচাৰছৰ সহ-লেখক:(মাইকেল এ ষ্ট্ৰচিঅ'ৰ সৈতে, কেম্ব্ৰিজ ইউনিভাৰ্চিটি প্ৰেছ, ২০০১), আৰু নেন'গাঁথনিৰ অপটিকেল আৰু অপ্টোইলেক্ট্ৰনিক প্ৰপাৰ্টিজৰ পৰিচয় (ষ্ট্ৰ'চিঅ', ভি. ভি. মিটিন, আৰু ভি. এ. কোচেলাপৰ সৈতে, কেম্ব্ৰিজ ইউনিভাৰ্চিটি প্ৰেছ, ২০১৯), আৰু একাধিক সম্পাদিত খণ্ডৰ সম্পাদক।

স্বীকৃতি

১৯৯৮ চনত দত্ত অপটিকেল ছ’চাইটিৰ ফেলো হয়। ১৯৯৯ চনত তেওঁক "হেটেৰ'ষ্ট্ৰাকচাৰ-ভিত্তিক অপ্টোইলেক্ট্ৰনিক আৰু ইলেক্ট্ৰনিক ডিভাইচসমূহত অৱদানৰ বাবে" আই ই ই ইৰ ফেলো হিচাপে নিৰ্বাচিত কৰা হয়, আৰু ২০০০ চনত আই ই ই য়ে তেওঁক "উচ্চ কাৰ্য্যক্ষমতাসম্পন্ন হেটেৰ'ষ্ট্ৰাকচাৰ অপ্টোইলেক্ট্ৰনিক ডিভাইচসমূহৰ বৈশিষ্ট্য আৰু উপলব্ধি, আৰু এই ক্ষেত্ৰত ডাঙৰ গৱেষণা কাৰ্যসূচী প্ৰতিষ্ঠা"ৰ বাবে হেৰী ডাইমণ্ড মেম'ৰিয়েল বঁটা প্ৰদান কৰে। ২০০৩ চনত ছ'চাইটি অৱ উইমেন ইঞ্জিনিয়াৰে তেওঁক তেওঁলোকৰ এচিভমেণ্ট বঁটা প্ৰদান কৰে।

২০১২ চনত এ পি এছ ফ'ৰাম অন ফিজিক্স এণ্ড ছ'চাইটিৰদ্বাৰা মনোনয়ন পোৱাৰ পিছত তেওঁ আমেৰিকান ফিজিকেল ছ'চাইটি (এ পি এছ)ৰ ফেলো হয়, "চৰকাৰ আৰু একাডেমীত গৱেষণা নেতৃত্ব আৰু প্ৰশাসনৰ বাবে, যাৰ জৰিয়তে তেওঁ সমাজৰ বাবে পদাৰ্থ বিজ্ঞানৰ প্ৰয়োগ, জনসাধাৰণৰ মাজলৈ প্ৰসাৰ আৰু পদাৰ্থ বিজ্ঞানৰ শিক্ষা বৃদ্ধিৰ বাবে সমৰ্থন আগবঢ়াইছে।" তেওঁ আমেৰিকান এছ'চিয়েচন ফৰ দ্য এডভান্সমেণ্ট অৱ চাইন্সৰ ফেলোও।