ভিক্টোৰিয়া জেনচেন

ভিক্টোৰিয়া বলিন ফ্ৰেডেৰিক জেনচেন (ইংৰাজী ভাষা: Victoria Boline Frederikke Jensen; ১৮৪৭–১৯৩০) এগৰাকী ডেনিছ ডিকনেছ আৰু নাৰ্ছিং তত্ত্বাৱধায়ক আছিল। ১৯১৪ চনৰ পৰা তেওঁ ছফি জহৰ্টমেনৰ উত্তৰাধিকাৰী হিচাপে ডেনিছ ডিকনেছ ইনষ্টিটিউটৰ নেতৃত্ব দিছিল। তেওঁ ফৰেইন খ্ৰীষ্টীয়ান মিছনেৰী ছচাইটিৰ দ্বাৰা ভাৰতত এখন হাস্পতাল স্থাপনৰ ক্ষেত্ৰতো মুখ্য ভূমিকা গ্ৰহণ কৰিছিল, যিটো ডেনমাৰ্কত 'ইড্ৰে মিছন' নামেৰে জনাজাত আছিল।^১২

জীৱনী

১৮৪৭ চনৰ ১৬ জানুৱাৰীত ক'পেনহেগেনত জন্মগ্ৰহণ কৰা জেনচেন চিনামাটিৰ ব্যৱসায়ী পিটাৰ জেনচেন আৰু তেওঁৰ পত্নী ক্ৰিষ্টিন মেৰী হেনচেনৰ কন্যা আছিল। তেওঁ ক'পেনহেগেনৰ নৰ্ৰেব্ৰো অঞ্চলত চাৰিজন ভাই-ভনীৰ সৈতে ডাঙৰ-দীঘল হৈছিল। কম বয়সতে তেওঁ ৰুডলফ ফ্ৰিমোডৰ দ্বাৰা প্ৰভাৱিত হৈছিল। কেইবছৰমান হোলবেকত বনকৰা মহিলা হিচাপে কাম কৰাৰ পিছত, ১৮৭৪ চনৰ পৰা তেওঁ ক'পেনহেগেন ডিকনেছ ইনষ্টিটিউটত ডিকনেছ হিচাপে প্ৰশিক্ষণ আৰম্ভ কৰে। পাঠ্যক্ৰম সম্পূৰ্ণ কৰাৰ পিছত তেওঁক লগে লগে ৰেণ্ডাৰ্ছ হাস্পতাললৈ পঠিয়াই দিয়া হয়, য’ত তেওঁ সতীৰ্থ ডিকনেছ আন্না মেৰী বয়চেনৰ সৈতে কাম কৰিছিল। ১৮৭৬ চনত জেনচেনক ফ্ৰেডেৰিকচবাৰ্গ হাস্পতালৰ হেড নাৰ্ছ হিচাপে নিযুক্তি দিয়া হয় আৰু তেওঁ ৩৮ বছৰ ধৰি তাতেই আছিল। ১৮৭৭ চনত তেওঁক এগৰাকী ডিকনেছ হিচাপে প্ৰতিষ্ঠা কৰা হয়। তেওঁ জীৱনৰ বাকী সময়ছোৱা ডিকনেছ ইনষ্টিটিউটতে অতিবাহিত কৰিছিল।^১

জেনচেনে ফ্ৰেডেৰিকচবাৰ্গ হাস্পতালত নাৰ্ছসকলৰ প্ৰণালীবদ্ধ প্ৰশিক্ষণৰ ব্যৱস্থা কৰিছিল। মাত্ৰ ৫০ জন ৰোগী থকা সৰু হাস্পতালখন ৭০০ জন ৰোগীৰ ক্ষমতালৈ বৃদ্ধি পোৱাৰ লগে লগে তেওঁ ঔষধ, অস্ত্ৰোপচাৰ আৰু মানসিক ৰোগৰ বাবে পৃথক বিভাগ মুকলি কৰিছিল। তেওঁৰ এই প্ৰশিক্ষণমূলক পদক্ষেপৰ বাবে তেওঁ ডেনিছ নাৰ্ছ সংগঠনৰ সন্মানীয় সদস্যপদ লাভ কৰিছিল। ১৯১২ চনত সংগঠনটোৰ মুৰব্বী চাৰ্লট মুংকে ফ্ৰেডেৰিকচবাৰ্গ হাস্পতালত জেনচেনৰ "বিবেচক আৰু দক্ষ ব্যৱস্থাপনা"ৰ কথা লিখিছিল।^১

১৯১৪ চনত যেতিয়া ছফি জহৰ্টমেনে ডিকনেছ ইনষ্টিটিউটৰ মুৰব্বী পদৰ পৰা অৱসৰ লয়, তেতিয়া জেনচেনক সেই পদ গ্ৰহণ কৰিবলৈ আমন্ত্ৰণ জনোৱা হয়। বয়স (তেতিয়া ৬৭ বছৰ) আৰু বাতবিষৰ বাবে তেওঁ কেৱল পাঁচ বছৰৰ বাবেহে এই পদত থাকিবলৈ সন্মত হৈছিল। প্ৰথম বিশ্বযুদ্ধ আৰু প্ৰতিষ্ঠানটোৰ বাজেটৰ সমস্যাৰ বাবে সেই সময়ছোৱা যথেষ্ট কঠিন আছিল। তথাপিও তেওঁ নাৰ্ছ সংগঠনৰ প্ৰয়োজনীয়তা অনুসৰি প্ৰতিষ্ঠানটোত যুৱ নাৰ্ছসকলৰ বাবে এটা প্ৰশিক্ষণ কাৰ্যসূচী প্ৰস্তুত কৰিছিল।^১

জেনচেনে অন্যান্য সংগঠনৰ সৈতে, বিশেষকৈ ইড্ৰে মিছনৰ সৈতে জড়িত আছিল, যাৰ জৰিয়তে শতিকাৰ আৰম্ভণিতে ভাৰতত এখন হাস্পতাল স্থাপন কৰা হৈছিল। ১৯০৪ চনৰ পৰা তেওঁ নৱগঠিত খ্ৰীষ্টীয়ান এছ'চিয়েশ্যন ফৰ নাৰ্ছেছৰ এগৰাকী সক্ৰিয় সদস্য আছিল। ১৯১৯ চনত অৱসৰ গ্ৰহণৰ সময়ত জেনচেনক ডেনিছ মেডেল অফ মেৰিট প্ৰদান কৰা হৈছিল।^১

১৯৩০ চনৰ ২৮ মে’ত ফ্ৰেডেৰিকচবাৰ্গ হাস্পতালত ভিক্টোৰিয়া জেনচেনৰ মৃত্যু হয়।^২