বেহনাম বেহজাদী১ (ফাৰ্চী ভাষা: بهنام بهزادی; জন্ম ২৪ জুলাই, ১৯৭২) এজন ইৰানী পৰিচালক, চিত্ৰনাট্যকাৰ, সম্পাদক আৰু প্ৰযোজক।
তেওঁ আন্তঃৰাষ্ট্ৰীয় পৰ্যায়ত প্ৰশংসিত ইৰানী পৰিচালকসকলৰ ভিতৰত অন্যতম আৰু তেওঁৰ চলচ্চিত্ৰসমূহে ৰাষ্ট্ৰীয় তথা আন্তঃৰাষ্ট্ৰীয় চলচ্চিত্ৰ মহোৎসৱৰ পৰা একাধিক বঁটা লাভ কৰিছে। তেওঁৰ শেহতীয়া পূৰ্ণদৈৰ্ঘ্য চলচ্চিত্ৰ ইনভাৰ্ছন কান চলচ্চিত্ৰ মহোৎসৱৰ অফিচিয়েল চেলেকচনৰ আন চাৰ্টেইন ৰিগাৰ্ড শাখাত প্ৰদৰ্শিত হৈছিল। এই চলচ্চিত্ৰখনে ইটালীৰ মেডফিল্ম ফেষ্টিভেলত শ্ৰেষ্ঠ চলচ্চিত্ৰৰ বঁটা আৰু ভাৰতৰ জয়পুৰ আন্তঃৰাষ্ট্ৰীয় চলচ্চিত্ৰ মহোৎসৱত শ্ৰেষ্ঠ চলচ্চিত্ৰ আৰু শ্ৰেষ্ঠ চিত্ৰনাট্যৰ বঁটা লাভ কৰে। তেওঁ স্পেইনৰ গ্ৰানাডা চলচ্চিত্ৰ মহোৎসৱৰ পৰা উই অনলি লাইভ টুৱাইচ (বিফোৰ দ্য বাৰিয়েল) চলচ্চিত্ৰখনৰ বাবে শ্ৰেষ্ঠ পৰিচালকৰ বঁটা লাভ কৰে। ইয়াৰ উপৰিও তেওঁ জাৰ্মানীৰ মানহাইম-হেইডেলবাৰ্গ আন্তঃৰাষ্ট্ৰীয় চলচ্চিত্ৰ মহোৎসৱ আৰু টকিঅ’ আন্তঃৰাষ্ট্ৰীয় চলচ্চিত্ৰ মহোৎসৱত বেন্ডিং দ্য ৰুলছ চলচ্চিত্ৰখনৰ বাবে জুৰীৰ বিশেষ বঁটা লাভ কৰিছিল। একেখন চলচ্চিত্ৰৰ বাবে তেওঁ থ্ৰী কন্টিনেণ্টছ ফেষ্টিভেল আৰু ফাজৰ আন্তঃৰাষ্ট্ৰীয় চলচ্চিত্ৰ মহোৎসৱত অডিয়েন্স চয়েছ বঁটাও লাভ কৰিছে। তেওঁ লাভ কৰা আন কিছুমান বঁটাৰ ভিতৰত ৩১ সংখ্যক ফাজৰ আন্তঃৰাষ্ট্ৰীয় চলচ্চিত্ৰ মহোৎসৱৰ আন্তঃৰাষ্ট্ৰীয় শাখাত শ্ৰেষ্ঠ পৰিচালকৰ বাবে ক্ৰিষ্টাল চিমৰ্গ আৰু শ্ৰেষ্ঠ চলচ্চিত্ৰৰ বাবে ক্ৰিষ্টাল চিমৰ্গ, লগতে ৰাষ্ট্ৰীয় শাখাত শ্ৰেষ্ঠ চিত্ৰনাট্যৰ বাবে ক্ৰিষ্টাল চিমৰ্গ বঁটা অন্যতম।
তদুপৰি, তেওঁ মাজোৰা ফিল্ম স্কুলৰ প্ৰতিষ্ঠাপক, যিখন হ’ল এখন অনলাইন শিক্ষামূলক ষ্টাৰ্ট-আপ। ইয়াৰ উদ্দেশ্য হৈছে চলচ্চিত্ৰ নিৰ্মাণৰ প্ৰতি আগ্ৰহ বৃদ্ধি কৰা আৰু চিনেমাৰ বিভিন্ন ক্ষেত্ৰত পেছাদাৰী প্ৰশিক্ষণ প্ৰদানৰ বাবে উপলব্ধ আটাইতকেই উদ্ভাৱনীমূলক শিক্ষণ পদ্ধতিসমূহ ব্যৱহাৰ কৰা।
জীৱনী আৰু কৰ্মজীৱন
বেহনাম বেহজাদী বৰুজেনীৰ জন্ম ১৯৭২ চনৰ ২৪ জুলাইত বৰুজেনত হৈছিল। তেওঁ কিশোৰ অৱস্থাতে থিয়েটাৰ আৰু ফটোগ্ৰাফীৰ জৰিয়তে নিজৰ শৈল্পিক কাৰ্যকলাপ আৰম্ভ কৰিছিল। তাৰ পিছত তেওঁ চলচ্চিত্ৰ নিৰ্মাণৰ প্ৰতি আগ্ৰহী হৈ পৰে আৰু ১৬ বছৰ বয়সতে নিজৰ প্ৰথম চুটি চলচ্চিত্ৰ ছুপাৰ ৮ নিৰ্মাণ কৰে। তেওঁ ইৰান ব্ৰডকাষ্টিং ইউনিভাৰ্ছিটিৰ পৰা চলচ্চিত্ৰ নিৰ্মাণৰ স্নাতক ডিগ্ৰী লাভ কৰে আৰু তাৰ পিছত পেছাদাৰীভাৱে চলচ্চিত্ৰ নিৰ্মাণ আৰম্ভ কৰে।
বেহজাদীয়ে ২০ খনতকৈও অধিক চুটি চলচ্চিত্ৰ, তথ্যচিত্ৰ আৰু টেলিভিছন চলচ্চিত্ৰ, লগতে ৪ খন পূৰ্ণদৈৰ্ঘ্য চলচ্চিত্ৰ নিৰ্মাণ কৰিছে। বিভিন্ন আলোচনীত তেওঁৰ কেইবাটাও প্ৰবন্ধ আৰু ৰচনা প্ৰকাশ পাইছে। তেওঁ ছুইডেনৰ গোটেনবাৰ্গ চলচ্চিত্ৰ মহোৎসৱকে ধৰি বিভিন্ন ৰাষ্ট্ৰীয় আৰু আন্তঃৰাষ্ট্ৰীয় উৎসৱৰ বিচাৰক সমিতিৰ সদস্য হিচাপেও কাৰ্যনিৰ্বাহ কৰিছে। তেওঁ ২০১৫ চনৰ পৰা তেহৰাণ ইউনিভাৰ্ছিটি অৱ আৰ্টৰ চিনেমা আৰু থিয়েটাৰ অনুষদ, আৰু তেহৰাণৰ চুৰে ইউনিভাৰ্ছিটীত স্নাতকোত্তৰ ডিগ্ৰীৰ শিক্ষাৰ্থীসকলক চলচ্চিত্ৰ নিৰ্মাণৰ শিক্ষা প্ৰদান কৰি আহিছে।
বাহ্যিক সংযোগ
তথ্যসূত্ৰ
উৎস আৰু অনুজ্ঞাপত্ৰ
উৎস: অসমীয়া ৱিকিপিডিয়া। এই প্ৰবন্ধটো অসমীয়া ৱিকিপিডিয়াৰ “বেহনাম বেহজাদী” প্ৰবন্ধৰ সংশোধন ৬১২৯২৪ (১৮ জুন ২০২৬)ৰ পৰা আনি অসমীয়া বিশ্বকোষৰ গাঁথনিলৈ ৰূপান্তৰ কৰা হৈছে। মূল লেখকসকলৰ তালিকা সম্পাদনা-ইতিহাসত উপলব্ধ। পাঠ্য CC BY-SA 4.0।