পেট্ৰিয়ন

পেট্ৰিয়ন (Patreon) হৈছে এটা সদস্যভুক্তিৰ সুবিধা থকা এটা ৱেবছাইট, যিয়ে কলা-কুশলীসকলক তেওঁলোকৰ সৃষ্টিৰাজিসমূহ অনুগামীসকলৰ সৈতে ভাগ-বতৰা কৰাৰ জৰিয়তে মাহিলী উপাৰ্জন কৰাৰ এক সুবিধা প্ৰদান কৰে।^১ পেট্ৰিয়ন সাধাৰণতে ইউটিউব ভিডিঅগ্ৰাফাৰ, লেখক, প'ডকাষ্টাৰ, সংগীতজ্ঞ আদি যিসকলে নিয়মিতভাৱে ইণ্টাৰনেটত তেওঁলোকৰ সৃষ্টিৰাজিসমূহ ভাগ বতৰা কৰে, তেওঁলোকে ব্যৱহাৰ কৰা দেখা যায়। ইয়াৰ জৰিয়তে তেওঁলোকে তেওঁলোকৰ অনুগামীসকলৰ পৰা (যাক পেট্ৰন বুলি কোৱা হয়) পোনপটীয়াকৈ অনুদান লাভ কৰিব পাৰে।^২ এই কোম্পানিটো সংগীতজ্ঞ Jack Conte^৩ আৰু ডেভেলপাৰ Sam Yam^{৩৪ ৫}-য়ে ২০১৩ চনত ছানফ্ৰান্সিছক'ত আৰম্ভ কৰিছিল। পেট্ৰিয়নে সাধাৰণতে কলা-কুশলীসকলৰ মাহিলী দৰমহাৰ পৰা ৫ ৰ পৰা ১২ শতাংশ শুল্ক আদায় কৰে আৰু প্ৰতি মাহৰ প্ৰথম দিনাই বিলিঙৰ কামবোৰ সম্পন্ন হয়।^৬

২০১৩ চনৰ মে' মাহত সংগীতজ্ঞ Jack Conte য়ে তেওঁৰ ইউটিউব ভিডিঅ'সমূহৰ জৰিয়তে জীৱিকা নিৰ্বাহৰ এক উপায় বিচাৰি Sam Yam-ৰ সৈতে লগ লাগি পেট্ৰিয়ন প্ৰতিষ্ঠা কৰে। এই মঞ্চই যিমানবাৰ কোনো এজন আৰ্টিষ্টে তেওঁৰ সৃষ্টিৰাজিসমূহ ভাগ বতৰা কৰে, সিমানবাৰেই অনুৰাগীসকলক (পেট্ৰন) তাৰ বাবত অনুদান আগবঢ়োৱাৰ এক সুবিধা প্ৰদান কৰে। প্ৰথম ওঠৰ মাহৰ ভিতৰত ৱেবছাইটটোত ১২৫,০০০ তকৈ বেছি অনুগামীৰ (পেট্ৰন) সদস্যভুক্তি হৈছিল।^৭ ২০১৪ চনৰ শেষৰফালে ৱেবছাইটটোৰ সদস্য কলা-কুশলীসকললৈ তেওঁলোকৰ অনুগামীসকলে মাহিলী ১,০০০,০০০ আমেৰিকান ডলাৰকৈ অনুদান পঠিয়াইছিল বুলি ৱেবছাইটটোৰ তৰফৰ পৰা ঘোষণা কৰা হয়।^৮