দ্য উইমেন (২০০৮ চনৰ চলচ্চিত্ৰ)

দ্য উইমেন (ইংৰাজী ভাষা: The Women) হৈছে ২০০৮ চনত মুক্তি পোৱা এখন আমেৰিকান কমেডি-ড্ৰামা ছবি, যিখন ডায়েন ইংলিছৰদ্বাৰা লিখা, প্ৰযোজনা আৰু পৰিচালিত। ছবিখনত মেগ ৰিয়ান, এনেট বেনিং, ইভা মেণ্ডেছ, ডেব্ৰা মেছিং, জাডা পিনকেট স্মিথ, কেৰী ফিচাৰ, ক্লৰিছ লিচমেন, দেবি মাজাৰ, বেট মিডলাৰ আৰু কেণ্ডিচ বাৰ্গেনকে ধৰি একাংশ বিশিষ্ট অভিনেত্ৰীয়ে অভিনয় কৰিছে।^১ এই ছবিখন ১৯৩৬ চনত ক্লেয়াৰ বুথ লুছে লিখা একে নামৰ নাটকৰ আধাৰত নিৰ্মিত ১৯৩৯ চনৰ চলচ্চিত্ৰ সংস্কৰণৰ এক আধুনিক পুনৰ্নিমাণ।^২ কাহিনীটো নিউয়ৰ্ক চহৰৰ এগৰাকী ধনী মহিলাক অনুসৰণ কৰে, যাৰ আপাত দৃষ্টিত নিখুঁত জীৱনটো স্বামীৰ অবিশ্বাস্যতা উন্মোচিত হোৱাৰ পিছত ভাঙি পৰে, আৰু ইয়াৰ ফলত তেওঁ আৰু তেওঁৰ বন্ধুসকল নিজৰ ব্যক্তিগত পৰিচয় পুনৰ মূল্যায়ন কৰিবলৈ বাধ্য হয়।

ছবিখনৰ দৃশ্যগ্ৰহণ নিউয়ৰ্ক চহৰ আৰু মেছাচুচেটছত কৰা হৈছিল। ১৯৩৯ চনৰ জৰ্জ কুকোৰ পৰিচালিত মূল ছবিখনৰ দৰে ইয়াতো পৰ্দাত কোনো পুৰুষ চৰিত্ৰ দেখা নাযায়।^৩ সমালোচকসকলে মূল ছবিখনৰ বুদ্ধিমত্তা আৰু মনোমোহাতাৰ অভাৱ উল্লেখ কৰি ছবিখনক বহুলভাৱে সমালোচনা কৰিছিল, যদিও কিছুমানে ইয়াৰ দৃশ্য-সজ্জা আৰু অভিনয়ৰ প্ৰশংসা কৰিছিল। বেছিভাগেই নেতিবাচক সমালোচনাৰ সত্ত্বেও ছবিখনে বক্স অফিচত মধ্যমীয়া সফলতা লাভ কৰে আৰু বিশ্বজুৰি প্ৰায় ৫ কোটি আমেৰিকান ডলাৰ উপাৰ্জন কৰে।^৪ ইভা মেণ্ডেছক ছবিখনত কৰা অভিনয়ৰ বাবে একাদশ আলমা বঁটাত শ্ৰেষ্ঠ অভিনেত্ৰীৰ মনোনয়ন লাভ কৰিছিল।^৫ আনহাতে, মূল অভিনেত্ৰীসকলে কেইবাটাও নেতিবাচক সন্মান লাভ কৰে, য'ত প্ৰতিগৰাকী আগশাৰীৰ অভিনেত্ৰীৰ বাবে ৰেজী বঁটাত শ্ৰেষ্ঠ বেয়া অভিনেত্ৰীৰ মনোনয়নো অন্তৰ্ভুক্ত আছিল।^৬

কাহিনী

মেৰী হেইনছ নামৰ এগৰাকী প্ৰতিভাৱান কাপোৰ ডিজাইনাৰ কানেকটিকাটৰ এটা সুন্দৰ উপনগৰীয়া ঘৰত তেওঁৰ ধনী বিত্তীয় স্বামী ষ্টিফেন আৰু ১১বছৰীয়া কন্যা মলিৰ সৈতে বাস কৰে। কলেজৰ দিনৰপৰা মেৰীৰ ঘনিষ্ঠ বন্ধু চিলভি ফাউলাৰ নিউয়ৰ্ক চহৰৰ ফেশ্বন জগতখনত ৰুচি আৰু শৈলীৰ ধাৰা নিৰ্ধাৰণ কৰা এখন জনপ্ৰিয় ফেশ্বন আলোচনীৰ সম্পাদিকা।

চিলভিয়ে আড্ডাবাজ মেনিকিউৰিষ্ট টানিয়াৰপৰা গম পায় যে ষ্টিফেনে ছাক্স ফিফথ এভিনিউত কাম কৰা সুগন্ধি বিক্ৰেত্ৰী ক্ৰিষ্টালৰ সৈতে প্ৰেমৰ সম্পৰ্ক ৰাখিছে। এই কথা মেৰীক ক’বলৈ দ্বিধাবোধ কৰা চিলভিয়ে গৰ্ভৱতী বন্ধু এডি কোহেনৰ সৈতে নিজৰ মনৰ কথা ভাগ কৰে। অৱশেষত মেৰীয়ে নিজেই একে মেনিকিউৰিষ্টৰপৰা স্বামীৰ অবিশ্বাস্যতাৰ কথা আৱিষ্কাৰ কৰে। মাক কেথেৰিনে নীৰৱ থাকিবলৈ উপদেশ দিলেও মেৰীয়ে প্ৰথমে ক্ৰিষ্টালৰ সৈতে আৰু তাৰ পিছত ষ্টিফেনৰ সৈতে মুখা-মুখি হয় আৰু শেষত বিবাহ বিচ্ছেদ বিচাৰে।

মেৰীৰ বন্ধু চিলভি, এডি আৰু লেখক এলেক্স ফিচাৰে তেওঁক সমৰ্থন কৰে, কিন্তু পৰিস্থিতি জটিল হৈ পৰে যেতিয়া চাকৰি হেৰুৱা চিলভিয়ে গছিপ স্তম্ভলেখক বেইলী স্মিথৰ সৈতে ষড়যন্ত্ৰ কৰি মেৰীৰ বৈবাহিক সংকটৰ কথা ফাদিল কৰে। এই বিশ্বাসঘাতকতাত আঘাতপ্ৰাপ্ত মেৰীয়ে চিলভিৰ সৈতে বন্ধুত্বৰ অন্ত পেলায়। ইয়াৰ ফলত মেৰীৰ কন্যা মলিও মানসিকভাৱে প্ৰভাবিত হয়।

শেষত মেৰীয়ে নিজৰ জীৱন পুনৰ গঢ়িবলৈ চেষ্টা কৰে—চাকৰি আৰম্ভ কৰে, নিজৰ ডিজাইন ফাৰ্ম খোলে আৰু কন্যাৰ সৈতে সম্পৰ্ক মজপুত কৰে। কাহিনীৰ অন্তিম অংশত বন্ধুত্বৰ পুনৰ মিলন, নতুন আৰম্ভণি আৰু নাৰী হিচাপে আত্ম-বিশ্বাসৰ প্ৰতিফলন দেখুওৱা হয়।

অভিনয়

• মেৰী হেইনছৰ চৰিত্ৰত – মেগ ৰিয়ান
• চিলভি ফাউলাৰৰ চৰিত্ৰত – এনেট বেনিং
• ক্ৰিষ্টাল এলেনৰ চৰিত্ৰত – ইভা মেণ্ডেছ
• এডি কোহেনৰ চৰিত্ৰত – ডেব্ৰা মেছিং
• এলেক্স ফিচাৰৰ চৰিত্ৰত – জাডা পিনকেট স্মিথ
• লিয়া মিলাৰৰ চৰিত্ৰত – বেট মিডলাৰ
• কেথেৰিন ফ্ৰেজিয়াৰৰ চৰিত্ৰত – কেণ্ডিচ বাৰ্গেন
• বেইলী স্মিথৰ চৰিত্ৰত – কেৰী ফিচাৰ
• মেগীৰ চৰিত্ৰত – ক্লৰিছ লিচমেন
• টানিয়াৰ চৰিত্ৰত – দেবি মাজাৰ
• মলি হেইনছৰ চৰিত্ৰত – ইণ্ডিয়া এনেংগা

হোম মিডিয়া

এই ছবিখন আমেৰিকাত ২০০৮ চনৰ ১৯ ডিচেম্বৰত আৰু যুক্তৰাজ্যত ২০০৯ চনৰ ১৯ মাৰ্চত ডিভিডিত মুক্তি লাভ কৰে।^৭