ড্ৰামাৰ অফ কৰ্টাচি

ড্ৰামাৰ অফ কৰ্টাচি (ইংৰাজী ভাষা: Drummer of Cortachy) হ’ল কৰ্টাচি দুৰ্গত বাস কৰা বুলি বিশ্বাস কৰা এটা প্ৰেতাত্মাৰ নাম। এই কাহিনীটোৰ বহুতো ব্যাখ্যা আছে, কিন্তু বিভিন্নজনৰ মতে ই ওগিলভি পৰিয়ালৰ সদস্য, আৰ্লিৰ আৰ্ল বা কৰ্টাচি দুৰ্গৰ গৰাকীৰ মৃত্যুৰ আগজাননী দিয়ে।^১ কোৱা হয় যে এই আত্মাভাগ ন ফুট ওখ আৰু মাজে মাজে ইয়াৰ সৈতে ভয়াৱহ পেঁপাৰ শব্দও শুনা যায়।^২ এই কিংবদন্তিৰ শিপা অতি কমেও ১৯ শতিকা আৰু আৰ্লিৰ ১৪ তম আৰ্লৰ মৃত্যুৰ সময়লৈকে বিচাৰি পোৱা যায়।^৩ আবিৰ্ভাৱৰ সময়ত তেওঁ এক বিশেষ ধৰণৰ ঢোলৰ শব্দ (tattoo) বজায় বুলি কোৱা হয়।^২

এই ভূতটোক কাৰ্লাইল পৰিয়ালৰ এজন ঢোলকৰ আত্মা বুলি ভবা হয়; যাক সেই সময়ৰ লৰ্ডৰ ঈৰ্ষাৰ বলি হৈ দুৰ্গৰ ওখ স্তম্ভৰ খিৰিকীৰে বাহিৰলৈ পেলাই দিয়া হৈছিল।^৪৫ অৱশ্যে কাহিনীটোৰ কিছুমান সংস্কৰণত কোৱা হয় যে ঢোলকজন এজন ঘৃণিত জনজাতীয় নেতাৰ বাৰ্তাবাহক আছিল আৰু আন এক সংস্কৰণ অনুসৰি, তেওঁ এজন ঢোলকৰ আত্মা আছিল যিয়ে ইচ্ছাকৃতভাৱে দুৰ্গটোক আসন্ন আক্ৰমণৰ বিষয়ে সতৰ্ক কৰি দিয়াত ব্যৰ্থ হৈছিল।^৬ কাহিনীৰ সকলোবোৰ সংস্কৰণতে কোৱা হৈছে যে মৃত্যুৰ পূৰ্বে তেওঁক নিজৰ ঢোলটোৰ ভিতৰতে ভৰাই থোৱা হৈছিল।

এই ঢোলকজনক আটাইতকৈ বিখ্যাতভাৱে ১৮৪৪ চনত দেখা পোৱা বুলি কোৱা হয়, যেতিয়া লেডী আৰ্লিয়ে (বা কিছুমানৰ মতে তেওঁৰ অতিথিৰ দলে) ৰহস্যময় ঢোলৰ শব্দ শুনিবলৈ পাইছিল।^২ কিংবদন্তি অনুসৰি, লেডী আৰ্লিয়ে পৰৱৰ্তী সময়ত তেওঁৰ মৃত্যুশয্যাত লিখিছিল যে তেওঁ "জানিছিল যে এই ঢোলৰ শব্দ তেওঁৰ বাবেই আছিল।"^১ ১৮৪৫ চনৰ জুন মাহত চতুৰ্থ পুত্ৰ ডনাল্ড ব্ৰুচ ওগিলভিৰ জন্ম দিয়াৰ পিছত লেডী আৰ্লিৰ মৃত্যু হয়। কেইবছৰমানৰ পিছত, এজন যুৱ ইংৰাজ ব্যক্তিয়ে লৰ্ড আৰ্লিৰ সৈতে নিশা এটা লজত চিকাৰ কৰি থকা অৱস্থাত ঢোলকজনৰ শব্দ শুনা বুলি জানিব পৰা গৈছে। তেনে নিশা এন্ধাৰত কোনে ঢোল বজাই থাকিব পাৰে বুলি লৰ্ডক প্ৰশ্ন কৰাত লৰ্ডে কেৱল উত্তৰ দিছিল, 'চুপ থাকা।' এসপ্তাহৰ ভিতৰতে লণ্ডনত লৰ্ড আৰ্লিৰ মৃত্যু হয়।^৭

১৯০০ চনত বোৱাৰ যুদ্ধত কোনো ধৰণৰ ৰহস্যময় শব্দ নোহোৱাকৈয়ে আৰ্লিৰ আৰ্লৰ মৃত্যু হোৱাৰ বাবে বৰ্তমান এই আত্মাভাগ সুপ্ত হৈ থকা বুলি ধৰা হয়।^১