চেন শ্বানবাও

চেন শ্বানবাও (ইংৰাজী ভাষা: Shen Shanbao; চীনা ভাষা: 沈善宝; ১৮০৮–১৮৬২), যাৰ সৌজন্য নাম চিয়াংপেই আৰু শৈল্পিক নাম চিহু চানৰেন, আছিল চিং ৰাজবংশৰ সময়ৰ এগৰাকী চীনা কবি আৰু লেখিকা। তেওঁ মিংইয়ুয়ান শ্বিহুয়াৰ ৰচয়িতা, যিখন গ্ৰন্থত তেওঁক অন্তৰ্ভুক্ত কৰি চিং বংশৰ ৫০০ গৰাকী মহিলা কবিৰ জীৱনীমূলক সমল পোৱা যায়।

জীৱনী

চেন শ্বানবাওৰ জন্ম হৈছিল হাংঝৌত, যি ১৯ শতিকাৰ আৰম্ভণিতে মহিলা শিল্পী আৰু লেখকসকলৰ কেন্দ্ৰ আছিল। ১৮১৯ চনত চেনৰ দেউতাকে আত্মহত্যা কৰে আৰু ১৮৩২ চনত তেওঁৰ মাকৰ মৃত্যু হয়। তেওঁ নিজৰ পোহপাল দিবলৈ নিজৰ চিত্ৰ আৰু কবিতা বিক্ৰী কৰিছিল। ১৮৩৭ চনত তেওঁৰ পালিত মাতৃয়ে স্থিৰ কৰা এখন বিবাহত তেওঁ এজন উচ্চ পদস্থ বিষয়া আৰু জিনশ্বি ডিগ্ৰীধাৰী ৱু লিংইউনৰ সৈতে বিবাহপাশত আৱদ্ধ হয়। তেওঁ আছিল ৱুৰ দ্বিতীয় পত্নী; বিবাহৰ পিছত তেওঁ ৱুৰ সন্তানসকলৰ মাহী মাক হয়। ৱুৰ সৈতে বিবাহৰ পিছত তেওঁ বেইজিঙলৈ গুচি যায়।^১

বেইজিঙত চেনে লিয়াং ডেশ্বিং, চু ইউঞ্জিয়াং, চু ঝংয়ান, গু টাইচিং, গং জিহাং আৰু লি পেইজিনকে ধৰি মহিলা লেখকৰ এটা চক্ৰৰ সৈতে যোগাযোগ স্থাপন কৰিছিল।^২ এগৰাকী শিক্ষয়িত্ৰী হিচাপেও তেওঁৰ গুৰুত্ব আছিল; তেওঁৰ এশৰো অধিক মহিলা শিষ্য থকা বুলি জনা যায়।^৩ তেওঁ লেখিকা ডিং পেইৰ লগতো বন্ধু আছিল, যিয়ে ১৮৩৬ চনত তেওঁৰ প্ৰথম কবিতা সংকলনৰ পাতনি লিখিছিল।

তেওঁৰ কিছুমান কৰ্ম ইংৰাজীলৈ অনুবাদ কৰা হৈছে।

উৎসসমূহ

• "Fong Embroidery Paper", Columbia University, last accessed June 9, 2007
• Wang Lijian王力堅, Qingdai caiyuan Shen Shanbao yanjiu,清代才媛沈善寳研究 (A Study of the Qing Poet Shan Shanbao) Taipei: Liren shuju, 2009.

বাহ্যিক সংযোগ

• তেওঁৰ কবিতাৰ পাঠ আৰু তেওঁৰ বিষয়ে তথ্য (চীনা ভাষাত) মিং চিং মহিলা লেখক ডাটাবেচ-ত পোৱা যায়।