চায়াকা মুৰাটা

চায়াকা মুৰাটা (村田沙耶香, Sayaka Murata; জন্ম:১৪ আগষ্ট, ১৯৭৯) বা মুৰাটা চায়াকা এগৰাকী জাপানী সাহিত্যিক। তেওঁ সাহিত্যৰ বাবে নতুন লেখকক প্ৰদান কৰা গুঞ্জ বঁটা, নমা সাহিত্য বঁটা, মিছিমা অ’কিঅ’ প্ৰাইজ আৰু আকুটাগৱা প্ৰাইজ লাভ কৰিছে।

জীৱনপঞ্জী

১৯৭৯ চনত জাপানৰ চিবা প্ৰিফেকচাৰৰ ইনজাইত মুৰাটাৰ জন্ম হৈছিল। সৰুতে প্ৰায়ে তেওঁ তেওঁৰ ককায়েক আৰু মাকৰ পৰা ধাৰলৈ লৈ বিজ্ঞানৰ কল্পকাহিনী আৰু ৰহস্য উপন্যাস পঢ়িছিল, আৰু প্ৰাথমিক বিদ্যালয়ৰ চতুৰ্থ শ্ৰেণীত নিজ হাতে এখন উপন্যাস লিখিবলৈ চেষ্টা কৰিছিল। জীয়েকক উৎসাহিত কৰিবলৈ মাকে লিখিবলৈ বুলি তেওঁক এটা ৱৰ্ড প্ৰচেছৰ কিনি দিছিল।^১ মুৰাটাই ইনজাইত মাধ্যমিক বিদ্যালয়ৰ শিক্ষা সম্পূৰ্ণ কৰাৰ পিছত, তেওঁৰ পৰিয়ালটো ট’কিঅ’লৈ যায়, য’ত তেওঁ কাচিৱা হাইস্কুলৰপৰা স্নাতক ডিগ্ৰী লাভ কৰে। তেওঁ তামাগৱা বিশ্ববিদ্যালয়ত পঢ়িছিল।^২

তেওঁৰ প্ৰথমখন উপন্যাস ‘জ্যুন্যু’ (ব্ৰেষ্টফিডিং)এ নতুন লেখকক প্ৰদান কৰা গুঞ্জ প্ৰাইজ লাভ কৰিছিল।^৩ ২০১৩ চনত ‘Shiro-iro no machi no, sono hone no taion no’ (অফ বনচ্‌, অফ বডি হিট, অফ হোৱাইটনিং চিটি)ৰ বাবে তেওঁ মিছিমা অ’কিঅ’ বঁটা আৰু ২০১৪ চনত ‘চেঞ্চ অৱ জেণ্ডাৰ এৱাৰ্ড’ নামে এটি বিশেষ বঁটা লাভ কৰে।^৪৫ ২০১৬ চনত তেওঁৰ দশম উপন্যাস ‘কমবিনি নিনজেন’-এ সন্মানীয় আকুটাগৱা বঁটা লাভ কৰে ^৬ আৰু সেই বৰ্ষতে ‘ভগ’ আলোচনীৰ জাপান সংস্কৰণত বছৰটোৰ মহিলা ৰূপে তেওঁৰ নাম উল্লেখ হয়। জাপানত ‘কমবিনি নিনজেন’ৰ ১.৫ মিলিয়ন কপি বিক্ৰী হয় আৰু ২০১৮ চনত ‘কন্ভিনিয়েঞ্চ ষ্ট’ৰ ৱ’মেন’ শীৰ্ষকেৰে কিতাপখন ইংৰাজীলৈ অনুবাদ হয়। ইংৰাজী ভাষালৈ অনুবাদ হোৱা এইখনেই তেওঁৰ প্ৰথম কিতাপ। পিছত ৩০টাতকৈও অধিক ভাষাত উপন্যাসখনৰ অনুবাদ প্ৰকাশ পায়।

২০১৭ চনলৈকে মুৰাটাই ট’কিঅ’ৰ ‘কন্ভিনিয়েঞ্চ ষ্ট’ৰ’ত কেৰাণী হিচাপে পাৰ্ট-টাইম কাম কৰিছিল।^৭

লেখনশৈলী

মুৰাকাৰ লেখনীত সমাজত সততে দেখা পোৱা পুৰুষ আৰু মহিলাৰ মাজৰ অসামঞ্জস্যসমূহৰ উল্লেখ হৈছে; বিশেষকৈ সাহিত্যৰ মাজেৰে তেওঁ লৈংগিক বিভেদ, অভিভাৱকত্ব আৰু যৌনতা সন্দৰ্ভত মুকলিকৈ আলোচনা কৰিছে।^৮ তেওঁৰ লেখনীৰ বহুতো বিষয় বস্তু আৰু চৰিত্ৰ তেওঁ ‘কন্‌ভিনিয়েঞ্চ ষ্ট’ৰ’ত কাম কৰি থকাৰ সময়ত হোৱা অভিজ্ঞতা আৰু দৈনন্দিন পৰ্যৱেক্ষণৰ আলমত গঢ় লৈ উঠিছে।^৭ যৌনতা, বৈবাহিক জীৱনৰ ভিতৰৰ সন্মুখীন হোৱা যৌনতাহীনতা, স্বেচ্ছামূলক বা অনিচ্ছাকৃত বহ্মচৰ্যৰ সামাজিক গ্ৰাহণযোগ্যতাক থীম ৰূপে লৈ তেওঁ তেওঁৰ কেইবাখনো উপন্যাস আৰু তেওঁৰ গল্প ‘আ ক্লিন মেৰেজ’ ৰচনা কৰিছে।^৯১০ ‘চিলভাৰ চং’ আৰু ‘অফ বনচ্‌, অফ বডি হিট, অফ হোৱাইটনিং চিটি’ত তেওঁ খোলাকৈ কৈশোৰ যৌনতা বিষয়ত আলোকপাত কৰিছে।^১১

স্বীকৃতি