ইলোৰা পাটনায়ক

ইলোৰা পাটনায়ক (ইংৰাজী ভাষা: Ellora Patnaik; জন্ম: ৫ ছেপ্টেম্বৰ, ১৯৬৮) এগৰাকী কানাডিয়ান চলচ্চিত্ৰ, মঞ্চ আৰু টেলিভিছন অভিনেত্ৰীৰ লগতে এগৰাকী ওডিছী নৃত্যশিল্পী।

প্ৰাৰম্ভিক জীৱন

তেওঁৰ জন্ম হৈছিল কানাডাৰ অণ্টাৰিঅ’ৰ টৰণ্টোত। তেওঁ পিতৃ-মাতৃ প্ৰমোদ আৰু চিত্ৰলেখা পাটনায়কৰ প্ৰথম সন্তান; তেওঁ নিজৰ ভাতৃ দেৱৰাজ পাটনায়কতকৈ সাত বছৰৰ ডাঙৰ। তেওঁৰ পিতৃ-মাতৃ ভাৰতৰ উৰিষ্যা (বৰ্তমান ওড়িশা) ৰাজ্যত জন্মগ্ৰহণ কৰিছিল আৰু ১৯৬০-ৰ দশকত কানাডালৈ প্ৰব্ৰজন কৰিছিল। পাটনায়কে নিজৰ শৈশৱত পৰিয়ালৰ সৈতে কেইবাবাৰো ভাৰত ভ্ৰমণ কৰিছিল।

তেওঁৰ পিতৃ-মাতৃ অতি সোনকালে অণ্টাৰিঅ’ৰ ওকভিললৈ আৰু তাৰ পিছত অণ্টাৰিঅ’ৰ বাৰ্লিংটনলৈ স্থানান্তৰিত হয়, য’ত তেওঁ এম. এম. ৰবিনছন হাইস্কুলত অধ্যয়ন কৰিছিল।

১৯৮৬ চনত তেওঁ (প্ৰয়াত) পদ্ম বিভূষণ কেলুচৰণ মহাপাত্ৰৰদ্বাৰা প্ৰশিক্ষণৰ বাবে নিৰ্বাচিত হয় আৰু ভাৰতৰ ওড়িশাত থকা ওডিছী গৱেষণা কেন্দ্ৰত অধ্যয়ন কৰিবলৈ যায়।

নৃত্য প্ৰশিক্ষণ

পাটনায়কৰ প্ৰথম আৰু প্ৰাথমিক নৃত্য গুৰু আছিল তেওঁৰ মাতৃ, যিয়ে অতি কম বয়সৰেপৰাই তেওঁক এগৰাকী ওডিছী নৃত্যশিল্পী হিচাপে প্ৰশিক্ষণ দিবলৈ আৰম্ভ কৰিছিল। ইয়াৰ উপৰি তেওঁ (প্ৰয়াত) পদ্মশ্ৰী পংকজ চৰণ দাস, (প্ৰয়াত) পদ্ম বিভূষণ কেলুচৰণ মহাপাত্ৰ, পদ্মশ্ৰী সংযুক্তা পাণিগ্ৰাহী আৰু পদ্মশ্ৰী গংগাধৰ প্ৰধানৰ দৰে বিশিষ্ট ব্যক্তিৰপৰা প্ৰশিক্ষণ লাভ কৰিছে।

ওডিছী নৃত্যৰ শিক্ষয়িত্ৰী

পাটনায়কে ১৯৮০ চনৰ মাজভাগৰপৰাই ওডিছী নৃত্যৰ শিক্ষা দি আহিছে। ১৯৯০ চনৰ আৰম্ভণিতে তেওঁ চিত্ৰলেখা ডান্স একাডেমীৰ কাৰ্যবাহী সঞ্চালক হিচাপে দায়িত্ব গ্ৰহণ কৰে।

অভিনয় জীৱন

তেওঁ ১৯৯২ চনৰপৰা ১৯৯৪ চনলৈকে আমেৰিকান একাডেমী অৱ ড্ৰামাটিক আৰ্টছত অধ্যয়ন কৰিছিল আৰু তৃতীয় বৰ্ষত তেওঁ সেই প্ৰতিষ্ঠানৰ নাট্য দলৰ সদস্য আছিল।

২০০৯ চনত তেওঁ ৱাইটিভিত সম্প্ৰচাৰিত কানাডিয়ান টেলিভিছন ধাৰাবাহিক হাউ টু বি ইণ্ডি-ত ইণ্ডি মেহতাৰ মাতৃ জ্যোতি মেহতাৰ চৰিত্ৰত অভিনয় কৰিছিল।^১ ২০১০ চনত তেওঁ ধাৰাবাহিকখনৰ আন এটা ছিজনৰ বাবে চিত্ৰগ্ৰহণ কৰিছিল।

বাহ্যিক সংযোগ

• Chitralekha Odissi Dance Creations website
• Chandra, Sarat (undated). "Mira Nair's New Girl". odissi.itgo.com. Retrieved October 10, 2013.