ল’ৰা আয়াৰ্ছ

ল’ৰা আয়াৰ্ছ (১ জুন ১৯২২ – ১৬ জানুৱাৰী ১৯৯২) এইডছৰ বিৰুদ্ধে কৰা যুঁজত পৰ্তুগালৰ অন্যতম অগ্ৰণী ব্যক্তি আছিল এজন ভাইৰ’লজিষ্ট।

আগতীয়া প্ৰশিক্ষণ

১৯২২ চনৰ ১ জুনত পৰ্তুগালৰ ফাৰো জিলাৰ ল’লেত জন্মগ্ৰহণ কৰিছিল ল’ৰা গুইলহাৰমিনা মাৰ্টিনছ আয়াৰ্ছ। ১৯৪৬ চনত মেডিচিনত স্নাতক ডিগ্ৰী লাভ কৰে। চিকিৎসালয়ত পৰৱৰ্তী ইণ্টাৰশ্বিপৰ সময়তে সংক্ৰামক ৰোগৰ অধ্যয়নৰ প্ৰতি আগ্ৰহী হৈ পৰিছিল। চিকিৎসালয়ৰ প্ৰশিক্ষণৰ পিছত ১৯৫০ চনৰপৰা ১৯৫৩ চনৰ ভিতৰত লিছবনত ইনষ্টিটিউট চুপিৰিয়েৰ ডি হিজিনে (আই এছ এইচ)ত ইণ্টাৰশ্বিপ কৰে, যিটো ইনষ্টিটিউট নেচনেল ডি ছাউডে ডা° ৰিকাৰ্ডো জৰ্জ (পৰ্তুগীজ নেচনেল ইনষ্টিটিউট অৱ হেল্থ - আই এন এছ এ)ৰ পূৰ্বৰ নাম আছিল। তাত তেওঁ ইনফ্লুৱেঞ্জা ভাইৰাছ আৰু অন্যান্য শ্বাস-প্ৰশ্বাসজনিত ৰোগৰ ওপৰত অধ্যয়ন চলাইছিল, য’ত হুপিং কাহৰ ৰোগ নিৰ্ণয়ৰ বাবে এটা ইউনিট স্থাপন কৰা হৈছিল। তাৰ পিছত তেওঁ ইংলেণ্ডত ভাইৰ'লজীৰ ওপৰত অধ্যয়ন চলাই ১৯৫৫ চনত আই এছ এইচলৈ উভতি আহি ভাইৰ'লজিষ্ট হিচাপে কাম কৰে।^১

ভাইৰ’লজী

সেই সময়ত পৰ্তুগালত ভাইৰ’লজীৰ জ্ঞান কাৰ্যতঃ নাছিল, আৰু আই এছ এইচত বিকশিত হ’বলগীয়া ভাইৰাছৰ ৰোগ অধ্যয়নৰ ক্ষমতাৰ বাবে এক বৃহৎ জৰুৰীতা আছিল। আয়াৰ্ছে ইনষ্টিটিউটৰ ভাইৰ’লজী পৰীক্ষাগাৰ গঢ়ি তুলিছিল আৰু ১৯৮৫ চনত সংক্ৰামক ৰোগৰ বাবে মহামাৰীবিজ্ঞান চোৱা-চিতা কেন্দ্ৰও গঢ়ি তুলিছিল। দেশখনত ৰোগৰ প্ৰাদুৰ্ভাৱ নিৰ্ণয় কৰিবলৈ পৰ্তুগালৰ প্ৰথমটো ৰাষ্ট্ৰীয় চেৰ’লজিকেল জৰীপৰ সমন্বয় সাধন কৰিছিল। আয়াৰ্ছে ট্ৰেক'মাৰ ওপৰতো গৱেষণা কৰিছিল।^১২

এইডছৰ ওপৰত কাম কৰা

১৯৮৩ চনৰপৰা আয়াৰ্ছ ইনছাৰ উপ-সঞ্চালক আছিল। এইডছৰ বিৰুদ্ধে যুঁজৰ বাবে পৰ্তুগীজ ৰাষ্ট্ৰীয় কাৰ্যসূচীৰ লগতে এইচ আই ভি সংক্ৰমণ নিৰ্ণয়ৰ ক্ষমতা বিকাশ কৰা প্ৰথম পৰ্তুগীজ প্ৰতিষ্ঠানসমূহৰ ভিতৰত অন্যতম আই এন এছ এত এইডছ ৰেফাৰেন্স লেবৰেটৰীও স্থাপন কৰে।^১

বঁটা

১৯৯০ চনত তেওঁৰ কামৰ স্বীকৃতি স্বৰূপে তেওঁক বিজ্ঞান, সাহিত্য বা শিল্পৰ ক্ষেত্ৰত অসাধাৰণ কৃতিত্বৰ বাবে প্ৰদান কৰা পৰ্তুগীজ ৰাষ্ট্ৰীয় বঁটা চেণ্ট জেমছ অৱ দ্য ছোৱাৰ্ড (পৰ্তুগীজ: অৰ্ডেম মিলিটাৰ ডি চাণ্ট'ইয়াগো দা এস্পাডা)ৰ মিলিটাৰী অৰ্ডাৰৰ বিষয়া হিচাপে নিযুক্তি দিয়া হয়। ১৯৯২ চনৰ ১৬ জানুৱাৰীত লিছবনত তেওঁৰ মৃত্যুৰ পাছত তেওঁক একেটা বঁটাৰ গ্ৰেণ্ড অফিচাৰ হিচাপে নিযুক্তি দিয়া হয়। ট্ৰেক’মাৰ ওপৰত কৰা কামৰ বাবে ৰিকাৰ্ডো জৰ্জ বঁটা লাভ কৰে। ইনছা ভাইৰ’লজী চেণ্টাৰৰ নাম তেওঁৰ নামেৰে ৰখা হৈছে, লগতে আলগাৰ্ভৰ আঞ্চলিক জনস্বাস্থ্য পৰীক্ষাগাৰও। ল'লেৰ কোৱাৰ্টেইৰাৰ এটা স্কুল কমপ্লেক্সো তেওঁৰ নামেৰে বহন কৰে।^১