এচিদ আক্ৰমণ

এচিড আক্ৰমণ ( Acid attack ) হ’ল কোনো ব্যক্তিৰ শৰীৰলৈ লক্ষ্য কৰি এচিদ বা তেনে জাতীয় ক্ষতিকৰ দাহ্য তৰল নিক্ষেপ কৰা আৰু ই হৈছে এক প্ৰকাৰৰ হিংসাত্মক আক্ৰমণ; যাৰ উদ্যেশ্য শৰীৰৰ অংশবিশেষ, বিশেষকৈ মুখমণ্ডল বিকৃত কৰা বা হত্যা কৰা। ^{১২৩ ৪} এই আক্ৰমণৰ অপৰাধীসকলে ভুক্তভোগীসকলৰ ওপৰত ক্ষয়কাৰী তৰল নিক্ষেপ কৰি শৰীৰ জ্বলাই দিয়ে, ছালৰ কোষকলা ক্ষতিগ্ৰস্ত কৰে, প্ৰায়ে হাড়বোৰ উন্মুক্ত হয় আৰু কেতিয়াবা দ্ৰৱীভূতও হয়। এচিড আক্ৰমণৰ ফলত স্থায়ী অন্ধত্ব হ'ব পাৰে। ^৫

এই আক্ৰমণবোৰত সচৰাচৰ আটাইতকৈ ব্যৱহৃত এচিড হৈছে ছালফিউৰিক আৰু নাইট্ৰিক এচিড। হাইড্ৰক্ল'ৰিক এচিড কেতিয়াবা ব্যৱহাৰ কৰা হয়, কিন্তু ই যথেষ্ট কম ক্ষতিকাৰক।^৬ বিশেষকৈ সেইবোৰ ঠাইত য'ত শক্তিশালী এচিড নিয়ন্ত্ৰিত বজাৰতহে পোৱা যায়, তাত শক্তিশালী ক্ষাৰীয় সামগ্ৰী, যেনে কষ্টিক চ’ডা (ছডিয়াম হাইড্ৰক্সাইড) আদিৰ জলীয় দ্ৰৱণ ব্যৱহাৰ কৰা হয়।^৭৮

এই আক্ৰমণবোৰৰ দীৰ্ঘম্যাদী পৰিণামবোৰৰ ভিতৰত থাকিব পাৰে অন্ধত্ব, লগতে চকু জ্বলা-পোৰা কৰা, মুখ আৰু শৰীৰৰ গুৰুতৰ স্থায়ী দাগ,^{৯১০১১} লগতে সুদূৰপ্ৰসাৰী সামাজিক, মানসিক আৰু অৰ্থনৈতিক অসুবিধা।^৪

বৰ্তমান সময়ত পৃথিৱীৰ বিভিন্ন প্ৰান্তত এচিড আক্ৰমণৰ খবৰ পোৱা যায়, যদিও সাধাৰণতে এনেকুৱা ঘটনা বেছিকৈ সংঘটিত হয় উন্নয়নশীল দেশবোৰত। ১৯৯৯ চনৰ পৰা ২০১৩ চনলৈ মুঠ ৩,৫১২ জন বাংলাদেশী লোকক এচিডৰে আক্ৰমণ কৰা হৈছিল।^১২১৩ অপৰাধীৰ বিৰুদ্ধে কঠোৰ আইনী ব্যৱস্থা গ্ৰহণ আৰু এচিড বিক্ৰীৰ ওপৰত কৰা নিয়ন্ত্ৰণৰ বাবে ২০০২ চনৰ পৰা প্ৰতি বছৰে এনে ঘটনাৰ হাৰ ১৫-২০% হ্ৰাস পাইছে। ভাৰতত এচিড আক্ৰমণ প্ৰতি বছৰে বৃদ্ধি হৈ আহিছে আৰু বছৰি ২৫০-৩০০টা ঘটনা সংঘটিত হয়। "এচিড চাৰ্ভাইভাৰ্ছ ট্ৰাষ্ট ইণ্টাৰনেচনেল"ৰ মতে প্ৰকৃত সংখ্যা ১০০০ অতিক্ৰম কৰিব পাৰে।^১৪

আক্ৰমণৰ কাৰণ

আক্ৰমণকাৰীৰ উদ্দেশ্য প্ৰায়ে ভুক্তভোগীজনক হত্যা কৰাৰ সলনি অপমানিত কৰা। ব্ৰিটেইনত এনে আক্ৰমণ, বিশেষকৈ পুৰুষৰ বিৰুদ্ধে হোৱা আক্ৰমণৰ বিষয়ে কম কৈ অভিযোগ দাখিল কৰা হয় আৰু ইয়াৰ ফলস্বৰূপে এনে বহু ঘটনা চৰকাৰী পৰিসংখ্যাত প্ৰকাশ নাপায়।^১৫ অপৰাধীসকলে কৰা আক্ৰমণৰ সচৰাচৰ কিছুমান কাৰণৰ ভিতৰত আছে:

• প্ৰেম আৰু যৌন প্ৰত্যাখ্যানৰ বাবে হোৱা ব্যক্তিগত বিবাদ^১৬
• যৌন সম্পৰ্কীয় ঈৰ্ষা আৰু কামনা^১৭
• যৌন সম্পৰ্ক কৰাত অমান্তি হোৱা, বিবাহৰ প্ৰস্তাৱ আৰু যৌতুকৰ দাবী অস্বীকাৰ কৰাৰ বাবে লোৱা প্ৰতিশোধ^৯
• সামাজিক, ৰাজনৈতিক আৰু ধৰ্মীয় অনুপ্ৰেৰণা
• দলবদ্ধ হিংসা আৰু প্ৰতিশোধ^১৮
• সংখ্যালঘু বিৰোধী বৈষম্য
• ভূমিৰ মালিকীস্বত্ব, পোহনীয়া জন্তু, বাসস্থান আৰু সম্পত্তিৰ ওপৰত হোৱা বিবাদ^১১

লৈংগিক অনুপাত

ভুক্তভোগী আৰু অপৰাধীসকলৰ লৈংগিক অনুপাতৰ সঠিক অনুমান কৰা কঠিন; কিয়নো বহুতো এচিড আক্ৰমণ ঘটনা নথিভুক্ত কৰা নহয়। উদাহৰণ স্বৰূপে ২০১০ চনত "দ্য লেঞ্চেট"-এ (The Lancet ) কৰা এক অধ্যয়নত বৰ্ণনা কৰা হৈছিল যে পাকিস্তানত এচিড আক্ৰমণৰ ঘটনাৰ কোনো নিৰ্ভৰযোগ্য পৰিসংখ্যা নাই। ^১৯

২০০৭ চনৰ এক সমীক্ষাত যোৱা ৪০ বছৰত ১৩খন দেশত ২৪টা অধ্যয়ন বিশ্লেষণ কৰা হৈছিল, য'ত ৭৭১ টা ঘটনা সামৰি লোৱা হৈছিল। [15] লণ্ডন স্থিত দাতব্য সংস্থা "এচিড চাৰ্ভাইভাৰ্ছ ট্ৰাষ্ট ইণ্টাৰনেচনেল"ৰ মতে, ৮০% এচিড আক্ৰমণ মহিলাৰ ওপৰত হয়, আৰু এচিড আক্ৰমণৰ সংখ্যা যথেষ্ট কমকৈ দেখুওৱা হয়। কিছুমান অঞ্চলত, পুৰুষৰ দ্বাৰা মহিলা ভুক্তভোগীসকলৰ ওপৰত কৰা আক্ৰমণ প্ৰায়ে যদি মই তোমাক নাপাওঁ, আন কোনেও তোমাক পাব নোৱাৰে জাতীয় মানসিকতাৰ দ্বাৰা পৰিচালিত হয়। ^২০