আলী আব্বাচী

আলী আব্বাচী (ফাৰ্চী ভাষা: علی عباسی; জন্ম: ১৯৮১) এগৰাকী ইৰানী-ছুইডিছ-ডেনমাৰ্কৰ চলচ্চিত্ৰ নিৰ্মাতা।^১ তেওঁ মূলতঃ শেলী, বৰ্ডাৰ, হোলী স্পাইডাৰ আৰু দি এপ্ৰেণ্টিচ চলচ্চিত্ৰসমূহৰ বাবে জনাজাত। আব্বাচীয়ে দ্য লাষ্ট অৱ আছ ধাৰাবাহিকখনৰ প্ৰথম সংস্কৰণৰ অন্তিম দুটা খণ্ডও পৰিচালনা কৰিছিল। তেওঁ আন চাৰ্টেইন ৰিগাৰ্ড বঁটা, চাৰিটা ৰবাৰ্ট বঁটা আৰু এটা জাৰ্মান ফিল্ম বঁটাকে ধৰি বিভিন্ন সন্মান লাভ কৰিছে। ইয়াৰ উপৰি তেওঁ সাতটা ইউৰোপিয়ান ফিল্ম বঁটা, এটা গোয়া বঁটা আৰু দুটা গুল্ডবাগে বঁটাৰ বাবে মনোনীত হৈছিল। তেওঁৰ চলচ্চিত্ৰসমূহে একাধিক একাডেমী বঁটাৰ বাবেও মনোনয়ন লাভ কৰিছে।

প্ৰাৰম্ভিক আৰু ব্যক্তিগত জীৱন

আব্বাচীয়ে ২০০২ চনলৈকে তেহৰাণ পলিটেকনিকত অধ্যয়ন কৰিছিল। ইয়াৰ পিছত তেওঁ ষ্টকহোমৰ কেটিএইচ ৰয়েল ইনষ্টিটিউট অৱ টেকন’লজীত স্থাপত্য বিদ্যা অধ্যয়ন কৰিবলৈ ছুইডেনলৈ প্ৰব্ৰজন কৰে।^২ ২০০৭ চনত কলা শাখাত স্নাতক ডিগ্ৰী লাভ কৰাৰ পাছত,^৩ তেওঁ নেচনেল ফিল্ম স্কুল অৱ ডেনমাৰ্কত নামভৰ্তি কৰে। ২০১১ চনত তেওঁ এম ফৰ মাৰ্কুছ নামৰ চুটি ছবিখনেৰে নিজৰ ডিগ্ৰী সম্পূৰ্ণ কৰে।^৪

আব্বাচী বৰ্তমান ক’পেনহেগেনত বাস কৰে আৰু এতিয়াও তেওঁৰ ওচৰত ইৰাণী পাছপ’ৰ্ট আছে।^৫৬

কৰ্মজীৱন

২০১৮: বৰ্ডাৰ

২০১৮ চনত আব্বাচীয়ে তেওঁৰ দ্বিতীয়খন চলচ্চিত্ৰ বৰ্ডাৰ মুক্তি দিয়ে। এই ছবিয়ে কান চলচ্চিত্ৰ উৎসৱত আন চাৰ্টেইন ৰিগাৰ্ড বঁটা লাভ কৰে। তদুপৰি ৯১ তম একাডেমী বঁটাত শ্ৰেষ্ঠ আন্তৰ্জাতিক পূৰ্ণদৈৰ্ঘ্য চলচ্চিত্ৰৰ বাবে চুইডেনৰ চৰকাৰী প্ৰৱেশিকা হিচাপে এই ছবিখনক নিৰ্বাচিত কৰা হৈছিল।^৭ যদিও চলচ্চিত্ৰখনে সেই শাখাত মনোনয়ন লাভ কৰিব নোৱাৰিলে, তথাপি ই শ্ৰেষ্ঠ মেকআপ আৰু হেয়াৰষ্টাইলিং শাখাত অস্কাৰ মনোনয়ন লাভ কৰিবলৈ সক্ষম হয়।^৮

২০২২: হোলী স্পাইডাৰ

তেওঁৰ তৃতীয়খন পূৰ্ণদৈৰ্ঘ্য চলচ্চিত্ৰ হোলী স্পাইডাৰ ২০২২ চনত মুক্তি পায়। এইখন আছিল চুইডেন, ডেনমাৰ্ক, ফ্ৰান্স আৰু জাৰ্মানীৰ যৌথ প্ৰযোজনাৰ এখন ফাৰ্চী ভাষাৰ চলচ্চিত্ৰ। ইৰাণৰ মাশ্বহাদত ২০০০ চনৰপৰা ২০০১ চনৰ ভিতৰত ১৬ গৰাকী যৌন কৰ্মীক হত্যা কৰা ধাৰাবাহিক হত্যাকাৰী ছাঈদ হানাঈৰ প্ৰকৃত জীৱনৰ কাহিনীৰ ওপৰত আধাৰিত কৰি ছবিখন নিৰ্মাণ কৰা হৈছে। ছবিখনত এগৰাকী কাল্পনিক মহিলা সাংবাদিকে এই ধাৰাবাহিক হত্যাকাণ্ডৰ তদন্ত কৰা পৰিৱেশটো চিত্ৰিত কৰা হৈছে।

চলচ্চিত্ৰখন ২০২২ চনৰ কান চলচ্চিত্ৰ উৎসৱত পাম ডি’অৰৰ বাবে প্ৰতিদ্বন্দ্বিতা কৰিবলৈ নিৰ্বাচিত হৈছিল, য’ত ২০২২ চনত ইয়াৰ প্ৰথম প্ৰদৰ্শনী হৈছিল।^৯ ছবিখনৰ মুখ্য অভিনেত্ৰী জাৰ আমিৰ ইব্ৰাহিমীয়ে এই উৎসৱত শ্ৰেষ্ঠ অভিনেত্ৰীৰ বঁটা লাভ কৰে। ছবিখন ৯৫ তম একাডেমী বঁটাত শ্ৰেষ্ঠ আন্তৰ্জাতিক পূৰ্ণদৈৰ্ঘ্য চলচ্চিত্ৰৰ বাবে ডেনমাৰ্কৰ চৰকাৰী প্ৰৱেশিকা হিচাপে নিৰ্বাচিত হয়^১০১১ আৰু ডিচেম্বৰৰ চৰ্টলিষ্টত স্থান লাভ কৰে।^১২

২০২৪: দি এপ্ৰেণ্টিচ

আব্বাচীৰ পৰৱৰ্তী চলচ্চিত্ৰ দি এপ্ৰেণ্টিচ, যিখন ডেভিড ডনাল্ড ট্ৰাম্পৰ প্ৰাৰম্ভিক জীৱনৰ ওপৰত আধাৰিত, ২০২৪ চনৰ কান চলচ্চিত্ৰ উৎসৱত প্ৰদৰ্শিত হৈছিল।^১৩ এই চলচ্চিত্ৰখনে ৯৭ তম একাডেমী বঁটাত দুটা অস্কাৰ মনোনয়ন লাভ কৰে। ইয়াৰ ভিতৰত আছিল চিবানিষ্টিয়ান ষ্টেনৰ বাবে শ্ৰেষ্ঠ অভিনেতাৰ মনোনয়ন^১৪ আৰু জেৰেমী ষ্ট্ৰংৰ বাবে শ্ৰেষ্ঠ সহ-অভিনেতাৰ মনোনয়ন।

স্পৰ্শ সম্পৰ্কীয় অভিযোগ

২০২৫ চনৰ ফেব্ৰুৱাৰী মাহত ক্ৰিয়েটিভ আৰ্টিষ্টছ এজেন্সী (CAA)ৰদ্বাৰা আয়োজিত এটা গোল্ডেন গ্ল’বছৰ পাৰ্টীত আব্বাচীৰ বিৰুদ্ধে এগৰাকী নাম প্ৰকাশ নকৰা অভিনেতাক অনুচিতভাৱে স্পৰ্শ কৰাৰ অভিযোগ উত্থাপিত হয়।^১৫ অৱশ্যে এই ঘটনাৰ কোনো চকুৰে দেখা সাক্ষী ৰাজহুৱাভাৱে আগবাঢ়ি অহা নাছিল। আব্বাচীয়ে নিজেই এক বিবৃতি জাৰি কৰি প্ৰকৃততে কি ঘটিছিল সেই সন্দৰ্ভত তেওঁৰ স্থিতি স্পষ্ট কৰে। প্ৰাৰম্ভিক প্ৰতিৱেদনত কোৱা হৈছিল যে এই ঘটনাৰ বাবে তেওঁৰ প্ৰতিনিধিত্বকাৰী এজেন্সীসমূহে তেওঁক বাদ দিছে, কিন্তু আব্বাচীয়ে তেওঁৰ বিবৃতিত স্পষ্ট কৰে যে তেওঁ দীৰ্ঘম্যাদী কেৰিয়াৰৰ সিদ্ধান্তৰ বাবে নিজেই সেই সম্পৰ্কসমূহ শেষ কৰিছিল।^১৬