ডেইমলাৰ এয়াৰৱে ডি হেভিলেণ্ড ডি এইচ.৩৪ বিমান দুৰ্ঘটনা

১৯২৩ চনৰ ১৪ ছেপ্টেম্বৰত ডেইমলাৰ এয়াৰৱে ডি হেভিলেণ্ড ডি এইচ.৩৪ বিমান দুৰ্ঘটনা সংঘটিত হয়, ডেইমলাৰ এয়াৰৱেৰ ডি হেভিলেণ্ড ডি এইচ.৩৪ য়ে ক্ৰয়ডনৰপৰা মানচেষ্টাৰলৈ নিৰ্ধাৰিত ঘৰুৱা যাত্ৰীবাহী বিমান উৰণৰ সময়ত ইংলেণ্ডৰ বাকিংহামশ্বাৰৰ ইভিংহোত দুৰ্ঘটনাগ্ৰস্ত হয় আৰু বিমানখনত থকা পাঁচজন লোকৰ মৃত্যু হয়।

বিমান

দুৰ্ঘটনাগ্ৰস্ত বিমানখন আছিল ডি হেভিলেণ্ড ডি এইচ.৩৪ জি-ইবিবিএছ, চি/এন ২৯। ১৯২২ চনৰ ৬ মাৰ্চত ই ডেইমলাৰ হাইৰ লিমিটেডৰ সৈতে উৰণসেৱাত যোগদান কৰিছিল।^১

দুৰ্ঘটনা

ক্ৰয়ডনৰপৰা মানচেষ্টাৰলৈ নিৰ্ধাৰিত ঘৰুৱা যাত্ৰীবাহী বিমান আছিল এই বিমানখন। ইয়াৰদ্বাৰা ডাক কঢ়িয়াই নিয়া বুলিও কোৱা হৈছিল,^২ যদিও পিছলৈ সাধাৰণ ডাকঘৰেও এই কথা অস্বীকাৰ কৰিছিল।^৩ বাকিংহামশ্বায়াৰৰ ওপৰেৰে উৰি থাকোঁতে ধুমুহাৰ সন্মুখীন হ’বলগীয়া হয়। প্ৰত্যক্ষদৰ্শীয়ে কয় যে, এটা ইঞ্জিন বন্ধ হৈ যায়, কিন্তু তাৰ পিছত পুনৰ ষ্টাৰ্ট কৰা হয়। তেওঁলোকৰ মতে, ইভিংহোৰ ফৰ্ড এণ্ডত জৰুৰীকালীন অৱতৰণ হ’ব বুলি বিমানখনে মাটিলৈ নামি আহি ইভিংহোত দুৰ্ঘটনাগ্ৰস্ত হয়।^২ প্ৰায় ১৮:০৫ বজাত এই দুৰ্ঘটনা সংঘটিত হয়।^৩ ধ্বংসাৱশেষ সম্পূৰ্ণ ওলোটাকৈ পোৱা যায়, ক্ৰু আৰু তিনিওজন যাত্ৰী দুয়োজনেই নিহত হয়। এজন সাক্ষীয়ে প্ৰচণ্ড বিস্ফোৰণৰ শব্দ শুনিছিল যদিও নিশ্চিত নাছিল যে, এইটো বিমানখন দুৰ্ঘটনাগ্ৰস্ত হোৱাৰ আগতেই হৈছে নে দুৰ্ঘটনাৰ ফলত হৈছে।^২

ধ্বংসাৱশেষৰপৰা যাত্ৰীসকলক গাঁওবাসীয়ে উলিয়াই আনে। কৰ’নাৰৰ তদন্তৰ অপেক্ষাত মৃত্যু হোৱা লোকজনক ইভিংহো টাউন হললৈ লৈ যোৱা হয়।^২ দুৰ্ঘটনাৰ ফলত ডেইমলাৰ এয়াৰৱেৱে ক্ৰয়ডন আৰু মানচেষ্টাৰৰ মাজত চলাচল কৰিবলৈ কোনো বিমান নথকাৰ বাবে সাময়িকভাৱে তেওঁলোকৰ সেৱা বন্ধ কৰি দিয়ে।^৩

১৭ ছেপ্টেম্বৰত ইভিংহো টাউন হলত এই তদন্ত আৰম্ভ হয়। প্ৰমাণ দিয়া হৈছিল যে পাইলটজন অভিজ্ঞ আছিল,^৪ তেওঁ ৭৫৫ ঘণ্টা উৰণ কৰিছিল,^৫ আৰু ক্ৰয়ডনৰপৰা যাত্ৰা কৰাৰ সময়ত বিমানখন উৰণযোগ্য আছিল। ই পৰ্যাপ্ত পৰিমাণৰ ইন্ধন কঢ়িয়াই লৈ ফুৰিছিল, ৭৩ ইম্পেৰিয়েল গেলন (৩৩০ লিটাৰ) ইন্ধন লৈ ক্ৰয়ডনৰপৰা ওলাই গৈছিল আৰু অনুমাণিকভাৱে প্ৰায় ৫০ ইম্পেৰিয়েল গেলন (২৩০ লিটাৰ) খৰচ হৈছিল। বিমানখনত আঠজন যাত্ৰী কঢ়িয়াব পাৰিছিল যদিও বিমানখনত মাত্ৰ তিনিজন যাত্ৰী থকাৰ বাবে ৪০০ পাউণ্ড (১৮০ কিলোগ্ৰাম) বেলেষ্ট কঢ়িয়াই নিয়া হৈছিল, লগতে বহু পৰিমাণৰ মেইলও কঢ়িয়াই নিয়া হৈছিল। প্ৰত্যক্ষদৰ্শীয়ে জনোৱা মতে, বিমানখন দুৰ্ঘটনাগ্ৰস্ত হোৱাৰ পূৰ্বে স্থবিৰ হৈ পৰিছিল। ২৪ ছেপ্টেম্বৰলৈকে তদন্ত স্থগিত ৰখা হয়।^৪

পুনৰ আৰম্ভ হোৱা তদন্তত বেলেষ্টৰ সন্দৰ্ভত অধিক প্ৰমাণ দিয়া হৈছিল, য’ত আছিল ৩৫০ পাউণ্ড (১৬০ কিলোগ্ৰাম) ওজনৰ বালিৰ বস্তা আৰু প্ৰায় ৫০ পাউণ্ড (২৩ কিলোগ্ৰাম) ওজনৰ এটা ডাঙৰ শিল। কোৱা হৈছিল যে বেলেষ্টটো এনেদৰে পেক কৰা হৈছিল যে উৰণৰ সময়ত ই লৰচৰ নকৰিলেহেঁতেন। জুৰীয়ে পাঁচোজন ভুক্তভোগীৰ ওপৰত “দুৰ্ঘটনাত মৃত্যু’’ৰ ৰায় বাহাল ৰাখে। তেওঁলোকে ক’ৰনাৰৰ পৰামৰ্শৰ সৈতে একমত হৈছিল যে বিমান দুৰ্ঘটনাৰ তদন্তৰ প্ৰতিৱেদন জনসাধাৰণৰ বাবে উপলব্ধ কৰা উচিত, যেনেকৈ তেতিয়া ৰে’ল দুৰ্ঘটনাৰ প্ৰতিৱেদনৰ ক্ষেত্ৰত হৈছিল।^৫ এই দুৰ্ঘটনা আৰু ইয়াৰ আগৰ মাহত কেণ্টৰ ইষ্ট মলিঙত সংঘটিত হোৱা দুৰ্ঘটনাৰ উদাহৰণ দি ১৯২৩ চনৰ ১৯ ছেপ্টেম্বৰৰ সংখ্যাত টাইমছে এই কথা আহ্বান জনাইছিল।^৬